Калгасьнікаў зноў падманулі :: Хартыя'97 :: Навiны

На нядаўняй сэлектарнай нарадзе было заяўлена, што заробак у сельскай гаспадарцы выплачаны цалкам. Ды вось бяда, менавіта пасьля гэтага мерапрыемства ў гомельскі абкам прафсаюзу работнікаў аграпрамысловага комплексу і іншыя інстанцыі пайшлі з раёнаў скаргі. Як высьвятляецца, у некаторых калгасах і саўгасах людзі ня бачаць заробку з красавіка.

Праверка ў некаторых гаспадарках Петрыкаўскага й Жыткавіцкага раёнаў паказала, што шэраговыя работнікі атрымалі ня грошы, а толькі абяцанкі аб іхняй выплаце. Прычына – у прымяненьні так званай вексэльнай сыстэмы аплаты працы. З работнікам заключаецца дамова, згодна якой заробак будзе выплочвацца ў натуральнай форме. Далей вылічаецца, колькі на заробак за пэўны перыяд прыпадае зерня будучага ўраджаю. Яно здаецца гаспадаркаю на хлебанарыхтоўчае прадпрыемства. Прычым у дакумэнтах пазначаецца, што зерне ад насельніцтва, указваюцца прозьвішчы здатчыкаў. Грошы за яго таксама трапляюць на асобны рахунак, зь якога й павінны выплочвацца работнікамі.

Але гэта ў тэорыі. Вексэльныя дамовы, заключаныя яшчэ ў красавіку з тэрмінам пагашэньня да 1 жніўня, да гэтага часу ня выкананыя. Людзі не атрымалі ні грошай, ні зерня. Але паколькі былі дамовы, якія яны зь вялікім нежаданьнем вымушаныя былі падпісаць, лічылася, што запазычанасьці па заробку няма.