Канфіскавана абсталяваньне, якое належыць КНГ АБСЭ :: Хартыя'97 :: Навiны

Абсталяваньне грамадзкага аб’яднаньня “Беларускі клюб выбаршчыкаў” было канфіскавана сёньня ў Менску супрацоўнікамі Фрунзенскага ўпраўленьня Дзяржаўнага камітэту па фінансавых расьследаваньнях. Не прад’явіўшы ордэра на вобыск ці якіх-небудзь іншых дакумэнтаў, што маглі б падцьвердзіць законнасььць канфіскацыі абсталяваньня, супрацоўнікі камітэту на чале з першым намесьнікам начальніка Камітэту па фінансавых расьсьледаваньнях Міхаілам Храманковым вывезьлі з офісу грамадзкага аб’яднаньня ўсе кампутары й аргтэхніку.Практычна ўсё канфіскаванае абсталяваньне належыла КНГ АБСЭ ў Беларусі.

Такім чынам, атрымалі разьвіцьцё падзеі, якія адбыліся 17 жніўня, калі супрацоўнікі Дзяржкамітэту фіннасавых расьсьледаваньняў больш за тры гадзіны праводзілі ў офісе “Беларускага клюбу выбаршчыкаў” праверку. Склалі акт і пасьля кароткага разьбіральніцтва пакінулі памяшканьне з умоваю, што 20 жніўня ім прадставяць дакумэнты на тэхніку, што знаходзіцца ў офісе, і фінансавую справаздачу аб дзейнасьці арганізацыі. 20 жніўня, супрацоўнікі Дзяржкамітэту фінансавых расьсьледаваньняў забралі ў Беларускага клюба выбаршчыкаў усе дакумэнты на абсталяваньне, якім карыстаецца аб’яднаньне.

Па словах старшыні “Беларускага клюбу выбаршчыкаў” Уладзімера Гудзеева, сёньня супрацоўнікі камітэту літаральна акупавалі цэнтральны офіс “Беларускага клюбу выбаршчыкаў”, сілком адабралі ў яго ключы ад офісу і, без ніякіх дакумэнтаў, не патлумачыўшы нават прычыны, вывезьлі з памяшканьня арганізацыі усё абсталяваньне. Пасьля гэтага офіс “Беларускага клюбу выбаршчыкаў” быў апячатаны.