АБСЭ асуджае наступ на свабоду слова ў Беларусі :: Хартыя'97 :: Навiны

У сваім прэс-рэлізе 21 жніўня прадстаўнік АБСЭ па свабодзе мас медыя Фрэймут Дзювэ асуджае перасьлед незалежных сродкаў масавай інфармацыі рэжымам Аляксандра Лукашэнкі.

“Матывуючы нейкімі фінансавымі недакладнасьцямі ў дакумэнтацыі “Мэджык” канфіскацыю цэлага накладу спэцвыпуску, прысьвечанага аднаму з кандыдатаў, улады зрабілі тое, што я называю “структуровай цэнзураю”. Пагражаючы закрыць прыватную газэту за публікацыю інфармацыі пра вядучага палітыка, Аляксандар Лукашэнка тым самым парушыў стандарты АБСЭ”, - адзначае Дзювэ.

17 жніўня 400.000 асобнікаў спэцвыпуску незалежнай беларускай газэты “Наша свабода” былі заарыштаванымі ў прыватнай друкарні “Мэджык” Менску супрацоўнікамі Камітэту па фінансавых расьсьледаваньнях, якія абвінавацілі друкарню ў “недакладнасьцях пры запаўненьні фінансавай дакумэнтацыі”. Канфіскаваны спэцвыпуск утрымліваў інфармацыю пра Уладзімера Ганчарыка, адзінага кандыдата ад дэмакратычнай апазыцыі на верасьнёўскіх выбарах, а таксама дадзеныя апошніх соцапытаньняў.

21 жніўня прадстаўнік АБСЭ па свабодзе СМІ Фрэймут Дзювэ зьвярнуўся зь лістом да Міністра замежных справаў Беларусі Міхаілу Хвастову, у якім выказаў “глыбокі занепакой” адносна захопу накладу незалежнай газэты. “Нам стала вядома, што “Наша Свабода” атрымала афіцыйнае папярэджаньне ад Дзяржкамдруку за публікацыю ў спэцвыпуску інфармацыі пра нібы зробленую Лукашэнкам заяву на сустрэчы з урадавымі чыноўнікамі. Паяпрэджаньне пагражае закрыцьцём газэты тэрмінам на тры месяцы ў выпадку чарговага парушаньня Закону аб прэсе. Мы таксама ведаем, што інфармацыя, якая стала повадам для вынясеньня папярэджаньня, была апублікавана многімі сродкамі масавай інфармацыі, уключна з расейскімі” – адзначыў Фрэймут Дзювэ.

Прадстаўнік АБСЭ па свабодзе СМІ мяркуе, што парушэньні свабоды прэсы ставяць пад сумнеў гатоўнасьць ураду правесьці свабодныя й справядлівыя выбары ў верасьні і адзначыў, што неад’емнаю ўмоваю для выбараў зьяўляецца забесьпячэньне бесперашкоднага доступу да сродкаў масавай інфармацыі. Прадстаўнік АБСЭ заклікае беларускі ўрад спыніць “бесперапынны ўціск на незалежную прэсу РБ” і вярнуць наклад спэцвыпуску “Нашай Свабоды”.