Улады сарвалі выхад газэты “Народная воля” :: Хартыя'97 :: Навiны

Сёньня ня выйшаў чарговы нумар незалежнай газэты “Народная воля”. Такім чынам, удар уладаў па прыватнай друкарні “Мэджык”, дзе друкуюцца незалежныя выданьні аказаўся дакладным – самае масавае незалежнае выданьне напярэдадні выбараў паралізавана. Нагадаем, што апошні нумар “Народнай волі” за 23 жніўня быў надрукаваны толькі часткова – з 45 тысячаў асобнікаў было надрукавана ўсяго 12. Зрываецца друк спэцвыпуску “Народнай волі”, цалкам прысьвечанага прадвыбарчай праграме адзінага кандыдата ад шырокай грамадзянскай кааліцыі Ўладзімера Ганчарыка.

Абсталяваньне друкарні “Мэджык” было апячатана 22 жніўня Камітэтам па фінансавых расьсьледаваньнях. Падставаю для гэтага стала вызначэньне Вышэйшага Гаспадарчага суда на арышт абсталяваньня “Мэджыка”. Але, акрамя таго, што канфіскацыя абсталяваньня ні ў якім выпадку ня можа прайсьці ўсяго толькі па вызначэньні ВГС, а толькі па ягоным рашэньні, праца “Мэджык” была паралізавана ў сувязі са справаю, што мела мейсца года таму, у свой час выйгранай (!) “Мэджыкам” у тым самым Гаспадарчым судзе.

І вось зараз, гэтая справа, стала падставаю для закрыцьця друкарні, дзе друкуецца большасьць незалежных газэтаў. Больш таго, на базе “Мэджыка” разьмяшчаецца друкарня “Знамение”, якая друкавала прадвыбарчыя ўлёткі адзінага кандыдата ад шырокай грамадзянскай кааліцыі. Прычым улёткі былі не які-небудзь падпольныя, а афіцыйныя, прадугледжаныя выбарчым заканадаўствам. Да таго ж, трэба зазначыць, што канфіскаванае абсталяваньне “Мэджыка” не зьяўляецца ўласнасьцю друкарні, канфіскаваная папера належыць друкаваным у “Мэджыку” выданьням.