Штаб адзінага кандыдата выступае супраць дэманстрацыі ўладамі ваеннай магутнасьці :: Хартыя'97 :: Навiны

Палітычная рада выбарчага штабу адзінага кандыдата ў прэзыдэнты Рэспублікі Беларусь ад шырокай грамадзянскай кааліцыі Ўладзімера Ганчарыка распаўсюдзіла заяву аб надыходзячых буйнамаштабных навучаньнях ўсіх відаў вайсковых фарміраваньняў “Нёман-2001”. Нагадаем, што яны пачынаюцца 26 жніўня. “Прапагандысцкая падача на дзяржаўнай тэлевізіі гэтага мерапрыемства вельмі далёкая ад рэчаіснасьці, - гаворыцца ў заяве. Па маштабах і значнасьці будучы ваенны спэктакль сур’ёзна саступае, напрыклад, такім манёўрам, як “Захад-81”. Па колькасьці войскаў і тэхнікі, тактычнай задуме, гэтае навучаньне мала чым адрозьніваецца ад шэраговага палковага навучаньня з баявой стральбой у мінулай Беларускай ваеннай акрузе”.

Галоўныя мэты, якія ставяцца ўладаю перад гэтым навучаньнем, усім зразумелыя, сцьвярджае Палітычная рада. “Беларускі кіраўнік пачынае грымець зброяй у адказ на патрабаваньне мірнай супольнасьці аб правядзеньні ў Беларусі сумленных і дэмакратычных выбараў. Страх дзейнай улады перад магчымаю паразаю на выбарах штурхае яе да застрашэнньня незадаволеных сваім жыцьцём грамадзянаў. Ніхто ня мае сумневаў у тым, што ў выпадку правалу на выбарах А.Лукашэнка накіруе рэгулярныя і аўтамабільныя частцы й падразьдзяленьні, якія знаходзяцца ў высокай ступені гатоўнасьці, для сілавога дасягненьня патрэбных яму вынікаў выбараў”.

У сувязі з гэтым Палітычная рада штабу адзінага кандыдата лічыць “недапушчальнай дэманстрацыю з боку Беларусі ваенай сілы перад сусьветнай грамадзкасьцю і ўласным народам”. “Беларусь – нейтральная краіна, яна ніколі не была й ня можа быць крыніцаю ваеннай напругі на эўрапэйскім кантыненце”, – гаворыцца ў заяве.

Нагадаем, што некалькі дзён таму Ўладзімер Ганчарык зьвяртаўся да дзейнага кіраўніка краіны з прапановаю адкласьці навучаньні “Нёман-2001” ці перанесьці іх на другі тэрмін – пасьля прэзыдэнцкіх выбараў.