Майкл Козак праводзіць паралель паміж Беларусьсю й Нікарагуа :: Хартыя'97 :: Навiны

Амэрыканскі амбасадар у Менску Майкл Козак у сваім лісьце ў ангельскую газэту “Гардзіан” падцьвердзіў пэўную паралель паміж Нікарагуа ўзору 1989-1990 гг. і сёньняшняй Беларусьсю. “Нашая задача і ў пэўнай ступені метадалёгія тыя самыя. Тады мы працавалі з санданісцкімі ўладамі, Арганізацыяй амэрыканскіх дзяржаваў, іншымі краінамі рэгіёну і былым Савецкім Саюзам, каб судзейнічаць свабодным, справядлівым і празрыстым выбарам. Сёньня мы працуем з Арганізацыяй па бясьпецы й супрацоўніцтву ў Эўропе, Асацыяцыяй арганізатараў выбараў у Цэнтральнай i ўсходняй Эўропе і дзяржавамi-членамі АБСЭ, уключна з членамі Эўразьвязу, каб пабудзіць беларускія ўлады стварыць які-небудзь мінімум доступу апазыцыі да прэсы і празрыстасьці працэсу падліку галасоў”, - заявіў Козак.

“Дваццаць гадоў таму мы раілі нікарагуанскай апазыцыі: лепей ажыцьцяўляць сваю палітычную павестку дня шляхам удзелу ў мірным выбарчым працэсе; сёньня мы даем тую самую параду апазыцыі ў Беларусі”, - адзначае амбасадар ЗША ў Менску.

Па словах М.Козака, былы нікарагуанскі прэзыдэнт Ортэга ніколі не аспрэчваў вынікі выбараў. Якія ён праіграў.”Наша задача ў Беларусі, як і задача іншых членаў АБСЭ, - дапамагчы Беларусі ў разьвіцьці выбарчай сыстэмы, якая адказвае міжнародным стандартам і якім Беларусь абавязалася адпавядаць пры ўступленьні ў АБСЭ”, - падкрэсьлівае М.Козак і дадае, што калі такая сыстэма мае месца , то менавіта беларускія выбаршчыкі, а ня ён ці хтосьці іншы, “будуць вырашаць, каму кіраваць іх краінаю у наступныя гады”.