Глава Нацбанку прымушае банкаўскіх работнікаў весьці агітацыю за Лукашэнку :: Хартыя'97 :: Навiны

Старшыня праўленьня Нацбанку Пётар Пракаповіч упаўнаважыў супрацоўнікаў банкаўскай сфэры Гомельскай вобласьці весьці агітацыйную працу за дзейнага прэзыдэнта краіны. Пра гэта ён заявіў у Гомлі на закрыцьці нарады, падставаю для якой стала неабходнасьць абмеркаваць канцэпцыю праграмы разьвіцьця банкаўскай сыстэмы Беларусі на 2001-2010 гады.

На нарадзе прысутнічалі кіраўнікі ўсіх банкаў, дырэктары буйных прамысловых прадпрыемстваў, а таксама прадстаўнікі ўладавых структураў. Таксама ў працы нарады прынялі ўдзел старшыня Гомельскага аблвыканкаму Аляксандар Якабсан, глава Гомельскага гарвыканкаму Леанід Барабанаў, а таксама намесьнік міністра ўнутраных справаў Беларусі Леанід Глухоўскі, прызначаны адказным за правядзеньне выбараў у рэгіёне.

Як паведамляе БелаПАН, Пётар Пракоповіч заявіў наступнае: “Вы, банкаўскія работнікі, павінны ўважліва падумаць і не чакаць, а ўжо зараз пачынаць працаваць з кліентамі і насельніцтвам. Ім трэба паказаць тое, што нас чакае. Калі пераможа апазыцыя, то будзе ліберальная эканоміка, дзе дзяржава адыходзіць ад кіраўніцтва эканомікай, і палітычная нестабільнасьць. Мы ня можам займацца хаосам у палітыцы”.

На думку старшыні праўленьня Нацбанку, супрацоўнікі банкаўскай сфэры павінны патлумачыць кліентам каштоўнасьць той стабільнасьці, якая дасягнута за апошнія 5 з паловаю гадоў. Пракаповіч падкрэсьліў: галоўнае, што павінны ведаць людзі, - гэта тое, што “шлях, які мы выбралі, цалкам правільны”. “Перамога дзейнага прэзыдэнта мусіць быць важкай. 55-60 адсоткаў – гэта добра. Але гэтага мала. Перамога павінна быць пераканаўчай для Захаду”, - сказаў глава Нацбанку.