Візыт главы БДІПЧ не адбудзецца праз адмову ў візах двум супрацоўнікам місіі :: Хартыя'97 :: Навiны

Місія Бюро па дэмакратычных інстытутах і правох чалавека (БДІПЧ) АБСЭ адмяніла з дырэктарам гэтай арганізацыі Жэрарам Студманам заплянаваны двухдзённы візыт у Беларусь з-за таго, што два з чатырох членаў місіі не атрымалі беларускія візы. Прадстаўнікі БДІПЧ заяўляюць, што беларускія ўлады ня далі задавальняючага тлумачэньня адносна прычынаў гэтай адмовы.

Імёны экспэртаў, якім адмовілі ў візах, не называюцца, аднак па неафіцыйнай інфармацыі, гэта былі Эндру Брус (Вялікабрытанія) і Брайян Бонар (ЗША), якія наведвалі Беларусь у складзе тэхнічнай місіі АБСЭ на выбарах мінулага году ў “палату прадстаўнікоў”. Тады АБСЭ адмовілася прызнаць выбары свабоднымі й справядлівымі.

Прэс-сакратар Міністэрства замежных справаў Павал Латушка паведаміў журналістам 23 жніўня, што спадары Брус і Банар трапілі ў сьпіс асобаў, якім забаронены ўезд у Беларусь. Латушка не назваў прычыны, па якіх Брус і Банар апынуліся ў “чорным сьпісе”, але сказаў, што адмова ва ўезьдзе ў Беларусь не зьвязаная з іх дзейнасьцю ў якасьці экспэртаў АБСЭ.

“Ніколі раней краіна-член АБСЭ так актыўна не супрацьдзейнічала назіраньню за выбарамі з боку БДІПЧ”, - заявіў у сувязі з апошнімі падзеямi сп.Студман. Ён нагадаў, што беларускія ўлады зацягвалі запрашэньне назіральнікаў БДІПЧ і не дазволілі ім назіраць за важнымі папярэднімі этапамі выбарчай кампаніі. У выніку, БДІПЧ здолела арганізаваць толькі абмежаваную місію па назраньні за выбарамі. На гэты час у Беларусі знаходзіцца 29 прадстаўнікоў БДІПЧ.

Прадстаўнікі БДІПЧ заяўляюць, што, нягледзячы на тое, што кантроль за ўездам – суверэннае права любой краіны, адмова ў візах зьяўляецца чарговым парушэньнем незалежнасьці місіі назіральнікаў, паколькі замінае ёй паўнацэнна выконваць свае функцыі. “Гэта яшчэ адзін крок у тым, што стала сыстэматычнай перашкодаю і ўмяшальніцтвам у назіраньні, - сказаў сп.Студман. – Нягледзячы на гэтыя абмежаваньні, нашая каманда застаецца ў Менску і працягвае намаганьні ахапіць усе аспэкты выбараў”.