Мінюст мае намер зьліквідаваць правабарончы цэнтар “Вясна” :: Хартыя'97 :: Навiны

Міністэрства юстыцыі Беларусі абмяркоўвае пытаньне аб ліквідацыі грамадзкага аб’яднаньня “Праваабарончы цэнтар “Вясна”. Аб гэтым гаворыцца ў заяве Мінюста. У ім паведамляецца, што цэнтру “Вясна” ужо вынесена два пісьмовых папярэджаньня за парушэньне статутнай дзейнасьці аб’яднаньня, закону “Аб грамадзкіх аб’яднаньнях” і “іншых актаў заканадаўства”.

У дакумэнце адзначаецца, што ў распараджэньні Міюста знаходзяцца 328 асобнікаў выдадзенага “Вясной”, як вынікае з выходных дадзеных, бюлетэню “Права на волю” накладам 299 асобнікаў (да 300 асобнікаў згодна беларускаму заканадаўству выданьне ня трэба рэгістраваць ў Дзяржаўным камітэце па друку – заўв. БелаПАН). Яшчэ 2 157 асобнікаў бюлетэню былі канфіскаваныя Дзяржкамдрукам. На думку Міюста, “Вясна” ня мела “законных падставаў для выпуску бюлетэню такім накладам, бо ліцэнзыя на выдавецкую дзейнасьць яму не выдавалася”.

Акрамя таго, гаворыцца ў заяве, Міністэрства юстыцыі “з розных крыніцаў” атрымала каля 259 бланкаў выпісак з партаколаў Рады “Вясны” аб прызначэньні назіральнікаў, у якіх няма подпісаў кіраўнікоў дадзенага аб’яднаньня, прозьвішчаў асобаў, адносна якіх прымаліся рашэньні, і нумары вучастку, куды яны накіраваныя, але з наяўнасьцю адбітку друку. “Гэта сьведчыць аб фіктыўнасьці згаданых дакумэнтаў, бо гэта дае магчымасьць самастоўна ўпісваць прозьвішча любой асобы, нават ня члена аб’яднаньня, хто пажадаў атрымаць статус назіральніка, і нумар вучастку, дзе ён бы хацеў назіраць”, - гаворыцца ў заяве.

Як лічыць Мінюст, “гэткія абставіны даюць падставу недабрасумленным грамадзянам ад імя назіральнікаў прадастаўляць ілжывую, недакладную інфармацыю любой міжнароднай арганізацыі, якая можа выкарыстоўвацца з мэтаю пастаноўкі пад сумнеў вынікаў выбараў прэзыдэнта Рэспублікі Беларусь”.