“Советская Белоруссия” скараціла праграмны выступ адзінага кандыдата :: Хартыя'97 :: Навiны

Праграма адзінага кандыдата ў прэзыдэнты Беларусі ад шырокай грамадзянскай кааліцыі Ўладзімера Ганчарыка апублікавана 31 жніўня ў газэтах “Советская Белоруссия” і “Звязда” без дапаўненьняў, прапанаваных кандыдатам. Як вядома, раней у гэтых дзяржаных газэтах была апублікаваная праграма кандыдата Аляксандра Лукашэнкі, якая значна пераўзышла ўсталяваны Цэнтрвыбаркамам аб’ём. У сувязі з гэтым ЦВК прыняў рашэньне даць магчымасьць астатнім кандыдатам павялічыць, па іхным жаданьні, аб’ём сваіх прадвыбарчых праграмаў да аб’ёму праграмы Лукашэнкі.

У адпаведнасьці з гэтым рашэньнем Уладзімер Ганчарык прадставіў ў рэдакцыі газэтаў дапаўненьне да свайго выступу. Аднак сёньня афіцыйныя СМІ надрукавалі праграму без дапаўненьняў, прычым абедзьве рэдакцыі аднолькава аргумэнтавалі сваю адмову. На думку “Советской Белоруссии” і "Звязды", у прадастаўленыя Ганчарыкам матэр’ялы былі ўключаныя сцьверджаньні, "содержащие огульную и субъективную критику других кандидатов в президенты". "По толкованию Центризбиркома это неприемлемо", - гаворыцца ў камэнтары рэдакцыі.

Прэс-сакратар Ганчарыка Зьміцер Верашчагін паведаміў БелаПАН, што каманда кандыдата ня згодная з такой “характарыстыкаю” і мае намер патрабаваць справядлівасьці законным шляхам. На дадзены момант, па ягоных словах, ужо рыхтуецца заява ў ЦВК са скаргаю на незаконныя дзеяньні дзяржаўных выданьняў.