Адзіны кандыдат сустрэўся з выбаршчыкамі Менску :: Хартыя'97 :: Навiны

Каля трох тысячаў менчукоў прыйшлі 2 верасьня на сустрэчу з адзіным кандыдатам ад дэмакратычных сілаў Беларусі Ўладзімерам Ганчарыкам. Яна прайшла з 12 да 14 гадзінаў на Кастрычніцкай плошчы Менску. Падчас сустрэчы Ўладзімер Ганчарык пазнаёміў прысутных з асноўнымі тэзамі сваёй прадвыбарчай праграмы і запэўніў іх: пасьля перамогі дэмакратычных сілаў кожны грамадзянін Беларусі будзе “жыць як у Эўропе”. Пры гэтым кандыдат не сумняваецца ў тым, што на выбарах 9 верасьня перамогуць дэмакратычныя сілы краіны.

На сустрэчы выбаршчыкі цікавіліся меркаваньнем Ганчарыка адносна фактаў зьнікненьня вядомых палітыкаў. Пыталіся пра лёс Лукашэнкі ў выпадку ягонай паразы на выбарах, аб адносінах кандыдата да незалежных СМІ, аб рэфармаваньні беларускай арміі. Адзіны кандыдат абяцаў падтрымаць пасьля перамогі на выбарах незалежныя сродкі масавай інфармацыі, перавесьці армію на прафэсыйную аснову. Ён таксама сказаў, што, калі Лукашэнка не датычны да зьнікненьня людзей то ён “будзе жыць па законах Беларусі”. Адзіны кандыдат заклікаў усіх сваіх прыхільнікаў не прымаць удзелу ў датэрміновым галасаваньні, якое пачнецца 4 верасьня.

Падтрымаць Уладзімера Ганчарыка на Кастрычніцкую плошчу прыйшлі былы прэм’ер-міністар Міхаіл Чыгір, былы міністар абароны Павал Казлоўскі, лідэры АГП, ПКБ, Партыі БНФ – Анатоль Лябедзька, Сяргей Калякін, Вінцук Вячорка, паэт Уладзімер Някляеў, іншыя палітыкі й грамадзкія дзеячы рэспублікі.

Наступная сустрэча адзінага кандыдата зь менчукамі адбудзецца з 18 да 22 гадзінаў 8 верасьня ў парку імя 50-годзьдзя Кастрычніка.