Вынікі паралельнага падліку галасоў на 4.09.2001 :: Хартыя'97 :: Навiны

Інфармацыя па праграме паралельнага падліку галасоў была сабрана грамадзянскай ініцыятываю “Незалежнае назіраньне” з 5,89% усіх вучасткаў Рэспублікі Беларусь. Вучасткі былі адабраныя метадам сацыялягічнай выбаркі і раўнамерна прадстаўляюць усе рэгіёны краіны. Паводле інфармацыі, якая паступіла ад назіральнікаў “Незалежнае назіраньне” у першы дзень датэрміновапга галасаваньня прагаласавала каля 3,5% выбаршчыкаў. Дадзеныя, атрыманыя назіральнікамі ад членаў выбарчых камісіяў, істотна не адрозьніваюцца ад іхніх асабістых падлікаў. У агульнай суме розьніца не пераўзыходзіць сотых доляў працэнту.

Назіральнікі таксама ацэньвалі па 5-ці бальнай шкале працу камісіяў і выкананьне імі патрабаваньняў выбарчага заканадаўства. Сярэдняя ацэнка за 4 верасьня – 3,6 бала. Хоць мелі месца факты грубага парушэньня заканадаўства, а таксама нядопускі назіральнікаў на вучасткі.

ГІ “Незалежнае назіраньне” таксама непакоіць нежаданьне Цэнтральнай выбарчай камісіі агучваць штодзённыя дадзеныя аб колькасьці прагаласаваўшых датэрмінова. Такім чынам, шырокая грамадзкасьць пазбаўленая магчымасьці адсочваць дынаміку, што зьмяншае ўзровень даверу да агульных вынікаў датарміновага галасаваньня, якія будуць агучаныя перад днём выбараў.

ГІ “Незалежгнае назіраньне” раіць выбаршчыкам галасаваць датэрмінова толькі ў выключных абумоўленых аб’ектыўнымі абставінамі выпадках.