Беларусь рызыкуе ператварыцца ў транзытны прыдадак :: Хартыя'97 :: Навiны

Калі пры ўладзе застанецца Аляксандар Лукашэнка, Беларусь ператворыцца ў транзытны прыдадак Усходу для транспартыроўкі прыродных рэсурсаў на Захад. Такое меркаванььне выказаў былы пасол Беларусі ў Латвіі, Эстоніі і Фінляндыі, былы прэтэндэнт у кандыдаты на пост прэзыдэнта Міхаіл Марыніч, артыкул якога апублікаваны ў нумары “БДГ” 5 верасьня.

“Калі дзейнаму прэзыдэнту ўдасца шляхам фальсыфікацыі ўтрымаць уладу, то яшчэ месяцы, магчыма, год у нас будзе працягвацца агалечваньне народа, банкруцтва калгасаў і саўгасаў, прыпыняць працу прадпрыемствы, пасьля чаго краіна стане транзытным прыдаткам”, - піша Марыніч.

Як лічыць былы пасол, “інстытут прэзыдэнцтва ператварыўся ў той цэнтар, куды вельмі хутка сьцякалася вялізная, бескантрольная ўлада. Тым самым ён становіцца сталай крыніцаю палітычнай нестабільнасьці і пагрозы для небясьпекі грамадзянаў”. Пры гэтам Марыніч падкрэсьлівае, што ў 1994 годзе, яшчэ дэпутатам Вярхоўнага Савету Беларусі 12-га скліканьня, ён быў супраць увядзеньня ў рэспубліцы пасады прэзыдэнта.

Аўтар артыкула заклікае галасаваць на выбарах за Ўладзімера Ганчарыка, каб “прадухіліць гэтую катастрофу, уратаваць краіну ад пагібелі”. “Мы маем гістарычны шанец самі зьмяніць сваё жыцьцё”, - мяркуе Марыніч.

Былы пасол лічыць неабходным “выпраўляць крызіснае становішча ў сфэры зьнешняй палітыкі”: “Расея для нас – стратэгічны партнэр як у эканамічным, так і ў геапалітычным аспэкце. Але Расея пайшла вельмі далёка наперад і ў эканамічных рэформах, і ў адносінах да дэмакратыі і свабодам. Нам трэба даганяць. (...) Што трэба эканоміцы нашых краінаў? Адзіная мытная прастора, эфектоўныя вытворчыя сувязі, умовы для ўзаемавыгоднага гандлю і свабоднай канкурэнцыі. Гэта рэальна і не закранае суверэнітэту дзьвюх краінаў”.