Лукашэнку нагадалі ягонае абяцаньне сыйсьці ў адстаўку :: Хартыя'97 :: Навiны

Нягледзячы на руплівую падрыхтоўку ўсіх шматлікіх сустрэчаў, якія праводзяць на фінішы выбарчай гонкі сёньняшні прэзыдэнт Аляксандар Лукашэнка, і адбор людзей, цікавы выпадак адбыўся ў горадзе Барысаў Менскай вобласьці. Адзін з рабочых, які выпадкова стаяў у натоўпе ля главы прэзыдэнта, асьмеліўся і задаў яму пытаньне: “Чаму вы сыходзіце ў адстаўку? Бо яшчэ ў 1994 годзе Вы, Аляксандар Рыгоравіч, абяцалі, што калі жыцьцё не палепшыцца праз два гады, то самі адмовіцеся ад пасады прэзыдэнта”.

Не задумваючыся ні на хвіліну, беларускі лідэр адказаў, што такога ён ніколі не казаў. І калі хтосьці зможа даказаць, што гэта ягоныя словы, ён адразу адмовіцца ад удзелу ў прэзыдэнцкіх выбарах. Шукаць доказы журналістам доўга не прыйшлося. Яны адкрылі рэспубліканскую газэту “Звязда” ад 6 ліпеня 1994 году, дзе тады яшчэ кандыдат у прэзыдэнты Аляксандар Лукашэнка адказваў на пытаньні чытачоў. Вось ягоны адказ на пытаньне, якое задала Валянціна Няхай.

“- У выпадку. калі надзеі, якія ўскладаюць на вас выбаршчыкі, не апраўдаюцца, ці знойдзеце вы ў сабе сілы на працягу году сыйсьці ў адстаўку?

- На протяжении года - нет. А вот через два года, если у меня ничего не получится, да, пойду. Почему? Я - человек, приближенный к производству, и не даю непродуманных обещаний. Два года необходимы для того, чтобы хоть кое-что стабилизировать. А вот если на протяжении двух лет никаких изменений не будет,- собирай манатки и уходи».

Замест камэнтару можна прывесьці апошнія дадзеныя, абнародаваныя Міждзяржаўным статыстычным камітэтам Садружнасьці. Беларусь па выніках студзеня-лютага гэтага году заняла першае месца па тэмпах інфляцыі сярод краінаў СНД (24,4 адсоткаў). На другім мейсцы – Расея (13,2 адсоткі). Кошты на харчовыя тавары за гэты час больш усяго – на 23,5 адсоткі – вырасьлі ў Беларусі, на 13,8 адсоткі – у Расеі.