БГК патрабуе прызнаць прэзыдэнцкія выбары несапраўднымі :: Хартыя'97 :: Навiны

Беларускі Гэльсынскі камітэт (БГК) накіроўвае скаргу ў Цэнтральную камісію Рэспублікі Беларусь па выбарах і правядзеньню рэспубліканскіх рэферэндумаў. У дакумэнце ўтрымліваецца патрабаваньне прызнаць несапраўднымі выбары Прэзыдэнта краіны, праведзенныя 9 верасьня, - у сувязі з грубымі парушэньнямі беларускага заканадаўства і міжнародных стандартаў. Пра гэта раніцай 10 верасьня паведаміла журналістам старшыня БГК Тацяна Процька.

Па ейных словах, скарга, якая ўтрымлівае больш за сто старонак і заснаваная на сьведчаньнях, прадстаўленых грамадзянскай ініцыятываю “Незалежнае назіраньне”, уключае дэтальны аналіз усяго выбарчага працэсу. Факты кажуць пра тое, што прэзыдэнцкія выбары павінны быць прызаны несапраўднымі паколькі мелі месца сур’ёзныя парушэньні беларускага заканадаўства на розных стадыях выбарчага працэсу. У прыватнасьці, як адзначаецца ў дакумэнце, “назіральны працэс датэрміновага галасаваньня быў немагчымы”. Выбарчыя бюлетэні даставаліся са скрыняў і замяняліся. Мелі месца адміністратыўныя злоўжываньні: напрыклад, перавагі аддаваліся тым студэнтам, якія прагаласавалі датэрмінова, і мелі пакараньне тыя, хто гэтага не рабіў.

“Беларускае заканадаўства,- адзначыла Процька, - прадугледжвае накіраваньне скаргі ў Цэнтральную камісію Рэспублікі Беларусь па выбарах і правядзеньню рэспубліканскіх рэферэндумаў на наступны дзень. Рашэньне Цэнтральнай камісіі можа быць пасьля абскарджана ў Вярхоўным судзе”.