Ганчарык накіраваў у ЦВК скаргу з патрабаваньнем прызнаць прэзыдэнцкія выбары несапраўднымі :: Хартыя'97 :: Навiны

Адзіны кандыдат ад шырокай грамадзянскай кааліцыі Ўладзімер Ганчарык накіраваў у Цэнтрвыбаркам скаргу з патрабаваньнем прызнаць несапраўднымі прэзыдэнцкія выбары. “Скарга мае больш за 30 старонак і засноўваецца на зьвестках, прадстаўленых грамадзянскай ініцыятываю “Незалежнае назіраньне”, беларускім Гэльсынскім камітэтам, стуктурамі свайго выбарчага штабу. Ён дэтальна аналізуе ўвесь выбарчы працэс і парушэньні падчас ягонага парвядзеньня”, - заявіў Уладзімер Ганчарык.

Па словах кандыдата, выбарчыя камісіі ствараліся “з парушэньнем прынцыпу прадстаўніцтва”, іх фармаваньне не было празрыстым і “дало магчымасьць цалкам кантраляваць выбарчы працэс”. Дзяржаўны апарат і СМІ былі цалкам задзейнічаныя ў працы па перавыбраньню дзейнага прэзыдэнта. “Праз дзяржаўную прапаганду, цэнзуру, перасьлед незалежных СМІ і ўмяшальніцтва ўладаў у кампанію адзінага кандыдата выбаршчыкі не атрымалі яснага уяўленьня пра свой выбар. Ёсьць дакладная інфармацыя, што выбарчыя бюлетні даставаліся са скрыняў і замяняліся. У працэсе падліку галасоў незалежным назіральнікам не далі магчымасьці ажыцьцявіць свае функцыі, што пазбаўляе вынікі галасаваньня дакладнасьці”, - мяркуе Ганчарык. Як лічыць адзіны кандыдат, “тое, што адбылося, гэта не “изящная победа”, як выказаўся Лукашэнка, а добрая падробка. Мы настойваем на правядзеньні другога тура: мы маем дакладныя дадзеныя (пагрэшнасьць ня больш за 2%), што Лукашэнка мае 46% галасоў, а ў мяне – 40. Гэтыя лічбы атрыманыя ў тым ліку па выніках нашага ўласнага комплекснага назіраньня з дапамогаю нашых прадстаўнікоў у выбарчых камісіях. Лукашэнка падвоіў сабе працэнт галасоў – гэта як мінімум. Адбыўся жахлівы падман. Шляхам прававога бязьмежжа зьдзесьнена спроба захопу ўлады”.

“У выпадку непрызнаньня нашай скаргі абгрунтаванай мы будзем працягваць дабівацца непрызнаньня выбараў у тым ліку акцыямі пратэсту, асабліва ў Менску, дзе Лукашэнка ніяк ня мог перамагчы. Адна з акцыяў адбудзецца сёньня а 17.00 на Кастрычніцкай плошчы”, - паведаміў Ганчарык.