Выбаркамы прызнаюць, што выганялі назіральнікаў з вучасткаў з дапамогаю міліцыі :: Хартыя'97 :: Навiны

Гомельская вабласная камісія па выбарах прэзыдэнта 10 верасьня фактычна прызнала, што аказвала супрацьдзеяньне назіральнікам у атрыманьні інфармацыі і якаснай працы на вучастках. Як заявіў на паседжаньні камісіі намесьнік яе старшыні Аляксандар Вусаў, “назіральнікі злоўжывалі сваімі паўнамоцтвамі, патрабуючы інфармацыю пра ход галасаваньня і іншыя зьвесткі”. “Найбольш настойлівых назіральнікаў з дапамогаю супрацоўнікаў УУС прыйшлося выводзіць за межы вучастку”, - сказаў Аляксандар Вусаў.

Камэнтуючы сытуацыю зь нядопускам да працы на вучастках у сямі раёнах вобласьці назіральнікаў ад Гомельскага вабласнога грамадзкага аб’яднаньня “Грамадзянскія ініцыятывы”, Вусаў паведаміў, што асабіста тэлефанаваў у раёны і прасіў за незалежных назіральнікаў. “Як бачыце, імкненьне ўрэгуляваць сытуацыю было, а вось ці прыслухаліся да маіх словаў на месцах – іншае пытаньне”, - сказаў намесьнік старшыні. Ён таксама паведаміў, што атрыманае ад “Грамадзянскіх ініцыятываў” а 16 гадзіне 9 верасьня заява аб нядопуску назіральнікаў у Ельскім праёне, было апертыўна разгледжана старшынём камісіі, як і трэба, у дзень галсаваньня, а адказ заявіцелю накіраваны праз пошту. Па інфармацыі БелаПАН, у Ельскім раёне так і не дапусьцілі да працы васьмёх назіральнікаў ад “Грамадзянскіх ініцыятываў”.

А тым часам, Аляксандар Вусаў падзякаваў выканаўчую ўладу, якая ўзяла на сябе ўсё тэхнічнае забесьпячэньне выбараў , і “кадры ўпраўленцкага рэсурсу”, якія таксама аказалі істотную дапамогу. Усё гэта, па словах Вусава, “прывяло да выніку, які прынёс пэўную карысьць – выбраньне Лукашэнкі”.