На каардынатара “Незалежнага назіраньня” завялі крымінальную справу :: Хартыя'97 :: Навiны

Шасьцёра ўзброеных людзей у міліцэйскай форме пастукалі ў дзьверы каардынатара “Незалежнага назіраньня” ў Шклоўскім раёне Паўла Нягурскага 7 верасьня позна вечарам. Яны адмовіліся прадставіцца і назваць прычыну такога позьняга візыту. Гаспадар не ўпусьціў у дом няпрошаных гасьцей і патэлефанаваў у міліцыю, а пасьля ў пракуратуру Шклову. Пракурор Сьніткоў сказаў, што гэта ён даў загад даставіць Нягурскага ў пракуратуру.

Ад суправаджэньня Нягурскі адмовіўся і сам накіраваўся ў Шклоў. Пракурор абвінаваціў незалежнага назіральніка ў дзейнасьці “з мэтаю магчымай фальсыфікацыі выбараў” і ўзбудзіў крымінальную справу па арт.192 КК: “Падробка дакумэнтаў аб выбарах..., або парушэньні тайны галасаваньня, або наўмысны няправільны падлік галасоў, ці іншае скажэньне вынікаў галасаваньня, зьдзейсьненае членам камісіі па выбарах Прэзыдэнта РБ, выбарчай камісіяй..., або іншай асобай, якая прымае ўдзел у падрыхтоўцы і правядзеньні выбараў ва ўсталяваным заканадаўствам парадку... Караецца штрафам, ці пазбаўленьнем права займаць пэўныя пасады і займацца пэўнай дзейнасьцю, ці папраўчымі працамі на тэрмін да 2 гадоў ці абмежаваньне свабоды на тэрмін да 5 гадоў ці пазбаўленьнем свабоды на той самы тэрмін”. Прычым гэты артыкул прадугледжвае адказнасьць толькі для суб’ектаў, якія прымаюць удзел у падрыхтоўцы і правядзеньні выбараў. А назіральнік не службовая асоба.

На наступны дзень аўтамабіль Нягурскага спынілі аўтаматчыкі і зноў даставілі ў пракуратуру. На гэты раз яму ўручылі пастанову аб вобыску і ўзялі падпіску аб нявыезьдзе. Дом Нягурскага абшукалі.

9 верасьня на вакзале ў Воршы двое супрацоўнікаў міліцыі спынілі ягонага сына Ігара. У грубай форме ў яго забралі рэчы і спрабавалі даставіць у аддзяленьне міліцыі. Хлопец зьбег, а на наступны дзень зьяўвіўся ў міліцыю і запатрабаваў вярнуць сумку. Але ні рэчаў, ні тлумачэньняў не атрымаў.

Нягледзячы на тое, што ў доме сталi гучаць званкі з пагрозамі, Нягурскі не зьбіраецца хавацца, а мае намер адстойваць свае інтарэсы ў судзе.