ЦВК ігнаруе доказы фальсыфікацыі вынікаў прэзыдэнцкіх выбараў :: Хартыя'97 :: Навiны

Цэнтрвыбаркам прызнаў неабгрунтаванымі скаргі Гэльсынскага камітэту, праваабарончага цэнтру “Вясна” і кандыдата ў прэзыдэнты Ўладзімера Ганчарыка аб непрызнаньні прэзыдэнцкіх выбараў. Такое рашэньне прынята Цэнтрвыбаркамам 14 верасьня на сваім паседжньні. Усе тры скаргі насілі комплексны характар і ахоплівалі ня толькі працэс галасаваньня па выбарах прэзыдэнта Беларусі, але і ўсю выбарчую кампанію ў агуле. Сярод асноўных парушэньняў называюцца незаконнае фармаваньне выбарчых камісіяў, злоўжываньні Лукашэнкам сваім службовым становішчам падчас агітацыі, адсутнасьць роўных умоваў агітацыі для ўсіх кандыдатаў. Заявіцелі прадставілі факты парушэньня выбарчага заканадаўства падчас датэрміновага галасаваньня, перашкоды назіраньню за выбарамі, кантролю падліку галасоў. Усіх гэтых фактаў дастакова для таго, каб прызнаць выбары несапраўднымі, але не для “прыдворнага” ЦВК.

Як вынікае з выступу члена ЦВК Надзеі Кісялёвай, Цэнтрвыбаркам вывучыў прадстаўленыя дакумэнты і “большасьць прыведзеных фактаў не знайшлі афіцыйнага падцьверджаньня”. Як палічылі члены Цэнтрвыбаркаму, “паўплываць на вынікі галасаваньня выяўленыя выпадкі парушэньняў заканадаўства не маглі”.

Заявіцелі скаргаў маюць намер у бліжэйшы час апратэставаць сёньняшняе рашэньне Цэнтрвыбаркаму ў Вярхоўным судзе. Па закону для гэтага ім адводзіцца тэрмін у 10 дзён. Нягледзячы на гэта, на 20 верасьня ўжо заплянавана ўрачыстая цырымонія інаўгурацыі Аляксандра Лукашэнкі.