Пачаўся перасьлед за ўдзел у выбарчай кампаніі :: Хартыя'97 :: Навiны

У Менскай вобласьці пачаўся перасьлед людзей, якія прымалі ўдзел у выбарчай кампаніі – агітавалі за адзінага кандыдата ў прэзыдэнты Ўладзімера Ганчарыка ці назіралі за галасаваньнем ва ўчастковых і рэгіянальных камісіях.

Так, у горадзе Крупкі загадчык раённага аддзелу адукацыі Анатоль Зайцаў афіцыйна аб’явіў сацыяльнаму педагогу сярэдняй школы №1 Уладзімеру Аляхновічу, што той звольнены з працы за амаральны ўчынак, які не сумяшчаецца з ягонай педагагічнай дзейнасьцю ў навучальнай установе.

Як паведаміў Радыё Свабода Ўладзімер Аляхновіч, яму інкрымінуюць тое, што тры месяцы таму тры крупскія падлеткі зь ліку ягоных вучняў былі затрыманыя міліцыяй з налепкамі “Час выбіраць!” і “Час убіраць”. Аднак сваё звальненьне ён раглядае як справу за агітацыйную працу падчас прэзыдэнцкіх выбараў у Крупках. У гэтыя дні стала беспрацоўнай Нэлі Шлойда, каардынатар “Незалежнага назіраньня” ў Маладэчне. Менскае кіраўніцтва фірмы “Юніфарм” звольніла яе з працы – з пасады загадчыцы маладэчанскай аптэкі. Па словах Нэлі Шлойда, на такі ўчынак кіраўніцтва “Юніфарму” падштурхнулі вабласныя выканаўчыя ўлады.

Па словах самога Ўладзімера Ганчарыка, такія выпадкі здараюцца ў дадзены момант ня толькі ў Менскай вобласьці, але й ва ўсіх рэгіёнах краіны і налічваюцца дзесяткамі.