Расейскія бізнэс-структуры пачалі дзяліць беларускую ўласнасьць :: Хартыя'97 :: Навiны

Самым нецярплівым аказаўся вядомы алігарх Алег Дэрыпаска. Ён прыехаў у сталіцу Беларусі ўжо 11 верасьня. Галоўны ягоны інтарэс – Менскі аўтамабільны завод. Але, маючы справу з такім надзейным партнёрам, як сёньняшняе кіраўніцтва Беларусі можна застацца не з МАЗам , а з носам. Тое, што дамоўленнасьці захоўваюцца дзіўным чынам, Дэрыпаска меў магчымасьць зразумець яшчэ ў жніўні. У прэсе зьявіўся фрагмэнт стэнаграмы перамоваў адносна лёсу МАЗу, дзе алігарх выказвае незадаволенасьць паводзінамі беларускага боку.

Верагодна, каб зьменшыць апетыт прадаўца, А. Дэрыпаска называе завод “хламам”. У сваю чаргу, Менск мае намер выставіць нейкія дадатковыя ўмовы, якія першапачатакова не былі абумоўленыя. Пасьля выбараў урад загаварыў пра гэта яшчэ больш упэўнена. Яшчэ з канца мінулага году афіцыйны Менск пачаў перадпродажную падрыхтоўку сваіх прадпрыемстваў. Дзе-небудзь нават пазвальнялі незгаворлівых дырэктароў.

Два праэкты набылі асаблівае гучаньне: расейскі банк “Авангард” рыхтуецца атрымаць бабруйскую “Белшыну”, а канцэрн “Балтыка” – піўзавод “Крыніцу”. Глава “Ітэры”Ігар Макараў гучна аб’явіў, што ягоная кампанія гатовая інвестыраваць у Беларусь 200 мільёнаў даляраў. Але за пару месяцаў да выбараў працэс запаволіўся, маўляў, трэба пачакаць, а то пачнуць абвінавачваць, што прэзыдэнт Радзімаю гандлюе. Ну, а зараз, калі Лукашэнка застаўся пры ўладзе, ён будзе патрабаваць для сябе больш выгодныя ўмовы.