Вядзецца траўля кіраўнікоў, якія не забясьпечылі на сваіх вучастках перамогу Лукашэнкі :: Хартыя'97 :: Навiны

Кіраўнікі некаторых берасьцейскіх установаў атрымалі спагнаньне ад мясцовай вертыкалі за тое, што не забясьпечылі перамогу Лукашэнкі на падведамственных вучастках. На двух выбарчых вучастках Маскоўскага раёну Берасьці не пасьпелі своечасова “прыгладзіць” вынікі галасаваньня і Ўладзімер Ганчарык атрымаў больш галасоў, чым Аляксандар Лукашэнка. На вучастку №51, што разьмяшчаўся ў інтэрнаце Дзяржаўнага тэхналягiчнага ўнівэрсытэту, адзінаму кандыдату аддалі свае галасы 46,5% выбаршчыкаў, а Аляксандру Лукашэнку – 35,7%. Ганчарык перамог Лукашэнку і на вучастку №63 у інтэрнаце берасьцейскага заводу “Цветотрон”: тут за яго прагаласавала больш за 45% выбаршчыкаў. За Лукашэнку – каля 42%.

Як паведамляе Радыё Свабода, вынікі выбараў на гэтых вучастках мясцовая вертыкаль не пакінула без увагі. На спэцыяльную нараду ў аблвыканкам выклікалі кіраўнікоў прадпрыемстваў і ўстановаў, якія павінны былі кантраляваць ход галасаваньня і забясьпечыць перамогу Аляксандра Лукашэнкі.

Адным з віноўных прызналі намесьніка дырэктара заводу “Цветотрон” па выхаваўчай працы Мікалая Карэцкага. Па сьведчаньнях з кампетэнтных крыніцаў, пасьля гэтай нарады Карэцкаму прыйшлося зьвярнуцца за медычнай дапамогай.

Тым часам, незалежныя назіральнікі атрымоўваюць зараз адказы на свае звароты ў пракуратуру, што датычаць парушэньняў выбарчага заканадаўства. Так, назіральнікі паведамілі пра тое, што напярэдадні 9 верасьня ў паштовых скрынях берасьцейскіх выбаршчыкаў зьявілася вельмі шмат друкаванай прадукцыі ў падтрымку Аляксандра Лукашэнкі. Гэтыя друкаваныя вырабы ня мелі выходных дадзеных.

З адказу пракуратуры выходзіць, што немагчыма знайсьці асобы, якія распаўсюджвалі гэтую падукцыю. Між тым, дакладна вядома, што разьнесьці яе па паштовых скрынях было загадана супрацоўнікам берасьцейскай пошты. Старшыня вабласнога аддзяленьня правабарончага цэнтру “Вясна” Ўладзімер Вялічка заявіў, што ён і не спадзяваўся на іншы адказ з пракуратуры, якая зрабіла ўсё, каб садзейнічаць фальсыфікацыі выбараў.