Савет Эўропы ў бліжэйшы час можа патрабаваць ад уладаў стварэньня міжнароднай камісіі па расьсьледаваньні “гучных” справаў :: Хартыя'97 :: Навiны

У выніковай рэзалюцыі сэсіі Парлямэнцкай Асамблеі Савету Эўропы гэтая ўплывовая міжнародная арганізацыя заклікала ўлады Ўкраіны стварыць камісію па справе зьнікненьня журналіста Георгія Гангадзэ. Анатоль Лябедзька, які ўзначальвае ў Стразбургу дэлегацыю Вярхоўнага Савету, лічыць, што стварэньне аналягічнай камісіі ў справе гучных палітычных зьнікненьняў у Беларусі, уключэньне ў выніковую рэзалюцыю сэсіі Парлямэнцкай Асамблеі СЭ пункту аб стварэньні камісіі па справе Гангадзэ як мінімум азначае, штосправы палітычных зьнікненьняў і забойстваў не зьяўляюцца ўнутранымі справамі гэтых дзяржаваў.

Як паведамляе Радыё Рацыя, Савет Эўропы заклікае ўкраінскія ўлады, якіх абвінавачваюць у датычнасьці да зьнікненьня Гангадзэ, стварыць спэцыяльную міжнародную камісію з прыцягненьнем да працы ў ёй заходніх крыміналістаў і экспэртаў. Дэпутат з Даніі Ганэ Свэрынсэн, якая дакладала па сытуацыі на Ўкраіне, заявіла, што без дэтальнага расьследаваньня справы Гангадзэ нельга казаць аб прагрэсе на шляху дэмакратызацыі Ўкраіны.

Камэнтуючы заклік да стварэньня міжнароднай камісіі ў справе зьнікнення Георгія Гангадзэ, кіраўнік дэлегацыі Вярхоўнага Савету Анатоль Лябедзька назваў гэта “беларускай перамогай”. Ён заявіў, што побач з удавой Міраславай Гангадзэ, якая выступіла на паседжаньнях буйных камітэтаў ПАСЭ, у Стразбургу маглі б знаходзіцца жонкі Юры Захаранкі, Віктара Ганчара, Анатоля Красоўскага і Зьміцера Завадзкага. На думку Лябедзькі, Савет Эўропы стварылі прэцэндэнт, які можа стаць матывам для стварэньня аналягічнай камісіі па справе гучных палітычных зьнікненьняў у Беларусі.

Тым больш, што аб справах бяз зьвестак зьніклых беларусах парлямэнтары ПАСЭ ўжо праінфармаваныя – члены дэлегацыі Вярхоўнага Савету выступілі на буйных фракцыях. Па словах Анатоля Лябедзькі, адным з пунктаў новай “папракаючай стратэгіі” адносінаў Савету Эўропы зь Беларусьсю можа стаць патрабаваньне незалежнага расьсьледаваньня зьнікненьняў у Беларусі.