Беларусь ня выканала ўмоваў праграмы маніторынгу МВФ. Крэдыту ня будзе :: Хартыя'97 :: Навiны

Скончыла працу ў Беларусі місія Міжнароднага валютнага фонду. Эксперты фонду прыйшлі да заключэньня, што ў наступныя паўгады Беларусь ня можа прэтэндаваць на атрыманьне крэдыту стэнд-бай ад МВФ. Асноўная прэтэнзія, выказаная ўраду кіраўніком місіі Мартай дэ Кастэлла-Бранка – высокі дэфіцыт бюджэту, які, нягледзячы на ўсялякія намаганьні, ня можа зьліквідаваць беларускае Міністэрства фінансаў. Яшчэ адно расчараваньне місіі – да сёньня не адменены дэкрэт №40, згодна якому дзяржава мае права канфіскаваць уласнасьць прыватных прадпрымальнікаў. Гэта, на думку місіі, стварае нялепшы клімат для прыватнага бізнэсу, паведамляе Радыё Свабода.

Паколькі гэтыя паказчыкі ўваходзілі асобнымі пунктамі ў праграму маніторынгу, вынікі нельга лічыць пасьпяховымі. “Шэраг макраэканамічных паказчыкаў ня быў выкананы, занадта вырасла запазычанасьць мясцовых бюджэтаў. Вырас дэфіцыт бюджэту, а павышэньне заробкаў зрабіла немагчымым стрыманьне бюджэтнага дэфіцыту. Паколькі мы не змаглі дамовіцца з урадам., мы пакідаем яму свае прапановы без абмеркаваньня”, -- заявіла Марта дэ Кастэлла Бранка.

Місія прапанавала ўраду працягваць супрацоўніцтва й пазбавіцца недахопаў. Але ўрад адмовіўся – яно мае, па словах дэ Кастэлла Бранкі, сваю ўласную праграму, якую зьбіраецца выконваць. Аднак гэтую праграму ня можа падтрымаць МВФ. “Мы лічым, што праграма ўраду ў справе росту аб’ёмаў вытворчасьці, павелічэньня заробкаў і зьніжэньня інфляцыі занадта аптымістычная”, -- заявіла кіраўнік місіі МВФ.

Яна лічыць, што ў лепшым выпадку аб’ёмы вытворчасьці ў Беларусі павялічацца на адзін адсотак. З гэтага і трэба сыходзіць пры плянаваньні ўсіх астатніх паказчыкаў. “Цяжка пераканаць Савет дырэктароў падтрымаць такую праграму”, -- адзначыў прадстаўнік МВФ у Літве й Беларусі Марк Хортан.