Генпракурор абавязаны абнародаваць вынікі расьсьледаваньня ў Курапатах :: Хартыя'97 :: Навiны

Грамадзкае аб’яднаньне “Таварыства беларускай мовы імя Францішка Скарыны” просіць генэральнага пракурора Беларусі Віктара Шэймана абнародаваць вынікі расьследаваньня, праведзенага ў Курапатах у 1997-1999 гг. У лісьце, адрасаваным В.Шэйману, старшыня ТБМ Алег Трусаў адзначае, што ў сувязі з пашырэньнем Менскай кальцавой аўтамабільнай дарогі заўважна вырас інтарэс грамадзкасьці да праблемы пахаваньня ахвяраў сталінскіх рэпрэсіяў ва ўрочышчы Курапаты.

Вынікі сьледзтва па раскрыцьці злачынстваў у Курапатах, якое ў 1988-1989 гг. правяла Пракуратура БССР пад кіраўніцтвам Георгія Тарнаўскага, былі даведзеныя да грамадзкасьці. Вынікі аналягічнага сьледзтва, праведзенага ў 1995 годзе старэйшым сьледчым па асабліва важных справах Пракуратуры Беларусі Валеры Камароўскім, таксама былі апублікаваныя ў рэспубліканскай прэсе. У 1997-1999 гг. старэйшым памочнікам ваеннага пракурора Віктарам Сомавым праводзілася новае расьсьледаваньне трагедыі ў Курапатах, аднак афіцыйная інфармацыя па выніках расьсьледаваньня не была абнародаваная.

Разам з тым, адзначаецца ў лісьце, у газэце "Славянский набат" № 17 ад 12 траўня 1999 году ў артыкуле “Курапаты. Косава...Правакацыі працягваюцца” Валянцін Корзун публікуе фрагмэнты матэр’ялаў сьледзтва, праведзенага Віктарам Сомавым. “Факт зьяўленьня самога артыкула, а таксама згаданыя у ёй матэр’ялы дазваляюць зрабіць высновы, што вынікі расьсьледаваньня сп. Сомава не ўтрымліваюць ні дзяржаўнай, ні іншай ахоўваемай законам тайны”, -- піша Алег Трусаў.

На падставе артыкула 34 Канстытуцыі краіны і сыходзячы з палажэньняў закону “Аб Пракуратуры Рэспублікі Беларусь” аўтар ліста просіць генпракурора давесьці да грамадзкасьць праз дзяржаўныя СМІ асноўныя вынікі сьледзтва, праведзенага Віктарам Сомавым.