10 сутак арышту за абарону крыжоў у Курапатах :: Хартыя'97 :: Навiны

Дзесяць сутак арышту – такі прысуд вынесьлі лідэру Маладога Фронту Паўлу Севярынцу за абарону крыжоў у Курапатах. Судзьдзя Менскага раённага суда больш за пяць гадзінаў разглядаў справу Паўла Севярынца. У выніку лідэр Маладога Фронту будзе адбываць пакараньне ў будынку на Старабарысаўскім тракце, бо разьмеркавальнік на вуліцы Акрэсьціна прызначаны толькі для тых, каго асудзілі ў менскіх гарадзкіх судах. Яшчэ аднаго члена Маладога Фронту Фёдара Жывалеўскага Савецкі суд Менску прыгаварыў да 7 сутак арышту па артыкулах 166 і 167 – удзел у несанкцыянаваным пікеце і супраціўленьне міліцыі. Іншых абаронцаў Курапатаў пакуль караюць штрафамі.

У той самы дзень адказнага сакратара Кансэрватыўна-Хрысьціянскай партыі БНФ Уладзімера Юхо аштрафілі на пяць мінімальных заробкаў. Валеры Буйвал і Алесь Раманоўскі заявілі аб хадайніцтве, каб у суд выклікалі амапаўца, які іх затрымліваў, і таму разгляд іхняй справы будзе працягвацца сёньня. Леанід Садоўскі павінен будзе выплаціць штраф у памеры 20 мінімальных заробкаў.

У Савецкі суд Менску ўчора выклікалі ўдзельнікаў руху ЗУБР і сябраў Маладога Фронту. Вось іхныя прозьвішчы: Андрэй Яграў, Яўген Афнагель, Ірына Кашталік, Мікалай Ткачэнка, Юры Фабішэўскі, Яраслаў Стэшык, Раман Казакевіч, Мікіта Сасім, Уладзіслаў Валадзько, Алесь Цялегін, Генадзь Дранковіч, Вераніка Купчанка і Яўген Клімаў.

Амаль усе яны патрабавалі адваката, і суды над імі перанесеныя. Толькі студэнт Гарадзенскага Ўнівэрсітэту Яўген Клімаў адмовіўся ад адваката і быў пакараны штрафам у памеры сем мінімальных заробкаў.