Міжнародная арганізацыя працы будзе разглядаць беларускае “прафсаюзнае пытаньне” :: Хартыя'97 :: Навiны

Напрыканцы лістпада ў Жэневе адбудзецца паседжаньне Адміністратыўнага савету Міжнароднай арганізацыі працы. Адным з асноўных пытаньняў у чарговы раз стане “прафсаюзнае пытаньне” ў Беларусі. Раней Камітэт па свабодзе асацыяцыяў Міжнароднай арганізацыі працы на паседжаньні 28-29 сакавіка прыняў Заключэньне аб становішчы прафсаюзных правоў у Беларусі. У дакумэнце ўраду Беларусі прапанавалі выправіць парушэньні і ніколі іх не паўтараць. Камітэт меў намер сачыць за выкананьнем рэкамэндацыяў. Разгляд “беларускага пытаньня” ініцыіравалі шэраг беларускіх прафсаюзаў, якія падалі ў МАП скаргу з пералікам выпадкаў парушэньня ўладамі правоў прафсаюзаў. Асноўныя прэтэнзыі тычыліся правоў працоўных на аб’яднаньне ў прафсаюзы й парушэньне правоў саміх прафсаюзаў.

Асобным пунктам праходзілі антыпрафсаюзныя нормы Дэкрэту Лукашэнкі “Аб некаторых мерах па ўпарадкаваньні дзейнасьці палітычных партыяў, прафэсыйных саюзаў і іншых грамадзкіх арганізацыяў”. Так, зарэгістраваць аб’яднаньне прафсаюзу на прадпрыемстве ці ў арганізацыі можна тады, калі ў ейны склад уваходзяць ня менш за 10% працоўных. МАП рэкамэндавала ўраду Беларусі выключыць прафсаюзы ці з усёй сфэры карыстаньня Дэкрэту, ці, хоць адносна буйных прадпрыемстваў, са сфэры празьмерных абмежаваньняў, якія патрабуюць 10%-га мінімальнага членства на ўзроўні прадпрыемстваў. Акрамя таго, Камітэт рэкамэндаваў ураду прыняць папраўкі да дзейнага заканадаўства ў частцы наяўнасьці ў прафсаюзнай арганізацыі юрыдычнай адрэсы, для таго, каб зьняць абмежаваньні ў рэгістрацыі, якія выклікаюць патрабаваньні мець такую адрэсу.

Аднак улады Беларусі нічога для выпраўленьня сытуацыі не зрабілі. Гэта стала падставаю для ўнясеньня Беларусі ў “спэцыяльны параграф” МАП – сьпіс краінаў, з якімі рэкамэндуецца ня мець гандлёвых адносінаў, таму што там парушаюцца асноўныя правы працоўных.

У чарговы раз “беларускае пытаньне” будзе раглядацца ў канцы лістапада. У Жэневе МАП плянуе арганізаваць трохбаковую сустрэчу сустаршыняў Нацыянальнай рады па працоўных і сацыяльных пытаньнях – віцэ-прэм’ера ўраду, прадстаўніка аб’яднаньняў наймальнікаў і работадаўцаў, а таксама прафсаюзнага дзеяча, які будзе абараняць інтарэсы Федэрацыі прафсаюзаў Беларускай і Беларускага кангрэсу дэмакратычных прафсаюзаў. “Калі віцэ-прэм’ер – сустаршыня Нацыянальнай рады – у Жэневу не прыедзе, то гэтая сустрэча не адбудзецца”, -- паведаміў Радыё Рацыя кіраўнік Міжнароднага аддзелу Федэрацыі прафсаюзаў Беларускай Алег Падалінскі. Адсутнасьць сустрэчы ў чарговы раз прадэманструе, што ўлады ў адносінах з прафсаюзамі не жадаюць прытрымлівацца нормаў, прынятых у цывілізаваным сьвеце.