Кадравы ператрус "сілавой вэртыкалі" :: Хартыя'97 :: Навiны

У "сілавых" ведамствах Беларусі адбыліся кадравыя зьмены. Сярод іншага Лукашэнка прызначыў новага намесьніка дзяржсакратара Савету Бясьпекі, замяніў начальніка Берасьцейскай міліцыі. Новыя прызначэньні таксама адбыліся ва ўправах КДБ па Віцебскай і Гомельскай абласьцёх і ў Міністэрстве абароны. Радыё Рацыя прагназуе на гэтай падставе хуткі пачатак новай антыкарупцыйнай кампаніі.

Зьмены адбыліся ў выніку апошніх візытаў Лукашэнкі па рэгіёнах. Гэтак, пасаду новага начальніка ўправы КДБ па Віцебскай вобласьці заняў Васіль Дземянцей. Іншы кіраўнік зьявіўся і ў гомельскіх супрацоўнікаў спэцслужбаў. Праўда, Анатоль Цакун дасягнуў кіраваньня Гомельскай управай КДБ, дзякуючы таму, што ягоны папярэднік, палкоўнік Мікалай Караткевіч, атрымаў павышэньне па службе: стаў намесьнікам дзяржсакратара Савету Бясьпекі.

Паводле зьвестак Рацыі, Аляксандар Лукашэнка вырашыў аб`явіць чарговую антыкарупцыйную кампанію, якую мае ачольваць менавіта Мікалай Караткевіч. Зусім верагодна, што ў Савеце Бясьпекі наноў утворыцца аддзел па барацьбе з карупцыяй, які пасьля прызначэньня Віктара Шэймана Генэральным пракурорам у поўным складзе быў адкамандзіраваны ў Пракуратуру Рэспублікі.

Неабходнасьцю актывізаваць барацьбу з карупцыяй афіцыйна тлумачаць і прызначэньне кіраўніком управы ўнутраных справаў Берасьцейскага аблвыканкаму Ўладзімера Шафарэнкі. Якраз палкоўнік Шафарэнка мае добры досьвед барацьбы з арганізаванай злачыннасьцю й карупцыяй. Цягам доўгага часу ён ачольвае адпаведнае падразьдзяленьне МУС. Апроч таго, палкоўнік Шафарэнка змагаўся з карупцыяй і ў асяродзьдзі міліцыянтаў - на пасадзе першага намесьніка службы ўласнай бясьпекі МУС.

Апошнія тры гады спадар Шафарэнка знаходзiўся ў Польшчы - займаў прэстыжную пасаду прадстаўніка МУС Беларусі ў суседняй краіне. Варта зазначыць: у гэткую ж пачэсную ссылку ва Ўкраіну Лукашэнка выправіў колішняга міністра ўнутраных справаў Валянціна Агальца. У Вільні інтарэсы беларускіх міліцыянтаў прадстаўляе былы начальнік управы дзяржаўнае аховы Міхал Цесавец, пад кіраўніцтвам якога ўвесну 1995 году спэцназаўцы зьбівалі апазыцыйных дэпутатаў у Авальнай залі Вярхоўнага Савету.

Зрэшты, фармальна лічыцца, што палкоўнік Шафарэнка атрымаў павышэньне па службовай лесьвіцы. А ягонае "цёплае месца" ў Варшаве, зь некаторых паведамленьняў, угатавана колішняму міністру ўнутраных справаў і былому намесьніку кіраўніка Адміністрацыі прэзыдэнта генэралу Юр`ю Сівакову.

Кадравые зьмены закранулі і Ўзбройныя Сілы краіны. На ключавую пасаду начальніка ўпраўленьня кадраў прызначаны Юры Меранцоў. Камандзірам 120-й гвардзейскай асобнай мэханізаванай брыгады, у якой калісьці служыў сам Лукашэнка, - Сяргей Ціханенка. Аляксандар Тышкевіч ачоліў знакаміты яшчэ за савецкім часам вучэбны цэнтар у Печах.