Лукашэнку патрэбна Расея для нарошчваньня экспарту зброі :: Хартыя'97 :: Навiны

Аляксандар Лукашэнка лічыць, што прыйшоў час пашыраць супрацоўніцтва з Расеяй у абарончай сфэры, уключна з экспартам узбраеньняў. Па ягоных словах, супрацоўнiцтва дзьвух краiн у экспарце ваеннай тэхнікі на замежныя рынкі “не зьяўляецца сакрэтам”. "У нас ёсьць чым гандляваць. Галоўнае, што мы не парушаем міжнародныя нормы і прынцыпы”, -- сказаў Аляксандар Лукашэнка.

Як перадае карэспандэнт РІА “Новости”, глава беларускай дзяржавы сустрэўся з генэральным дырэктарам федэральнага дзяржаўнага ўнітарнага прадпрыемства “Рособоронэкспорт” Андрэям Бельянінавым і выканаўчым сакратаром расейска-беларускай міждзяржаўнай фінансава-прамысловай групы “Абарончыя сыстэмы” Сяргеем Бацехіным. Андрэй Бельянінаў падкрэсьліў важкасьць каардынацыі намаганьняў Беларусі й Расеі пры пастаўках узбраеньня на міжнародныя рынкі. Пры гэтым ён асабліва падкрэсьліў пра неабходнасьць узгадненьня дзеяньняў вытворцаў дзьвюх дзяржаваў.

Падчас візыту ў Менск дэлегацыя “Росабаронэкспарту” і “Абарончых сыстэмаў” сустрэнецца з кіраўніцтвам Міністэрства прамысловасьці Рэспублікі Беларусь і шэрагу беларускіх прадпрыемстваў, а таксама з дзяржаўным сакратаром Савету бясьпекі краіны Генадзем Нявыгласам.

Міждзяржаўная фінасава-прамысловая група “Абарончыя сыстэмы” створаная на аснове расейскай фінансава-прмысловай групы з такім самым назовам у адпаведнасьці з пагадненьнем паміж урадамі Расеі й Беларусі ад 11 лютага 2000 году.

Як паведаміў РІА "Новости" дарадца гендырэктара “Абарончых сыстэмаў” Ігар Мяшчан, на сёньня гэта адзіная міждзяржаўная фінансава-прамысловая група, якая створана на аснове рэальна дзейснай кааперацыі паміж расейскімі й беларускімі прадпрыемствамі ў рамках распрацоўкі, вытворчасьці й мадэрнізацыі сродкаў СПА.

На ягоную думку, прадпрыемствы ВПК дзьвюх краінаў маюць усе магчымасьці для ўзаемадзеяньня й кааперыраваньня. У прыватнасьці, гэта тычыцца пытаньняў распрацоўкі й рэалізацыі комплексных праектаў СПА, уключна з зянітна-ракетным комплексам С-125 “Пячора-2М”, радарамi і іншай спэцыяльнай тэхнікай.

На дадзены момант у міждзяржаўную фінансава-прамысловую групу ўваходзяць вядомыя канструктарскае бюро і іншыя прадпрыемствы ВПК. У іх ліку МКБ “Факел” імя акадэміка Грушына, маскоўскі НДІ прыборнай аўтаматыкі, КБ “Кунцава”, “Завод імя Камінтэрну”, Менскі завод колавых цягавікоў.