Сьведкі злачынстваў групы Ігнатовіча пазьбягаюць залі суда :: Хартыя'97 :: Навiны

Закрыты працэс аб выкраданьні расейскага тэлеаператара фактычна яшчэ не пачаўся: Дзімін эпізод – у самым канцы сьпісу злачынстваў, якія інкрымінуюцца абвінавачанным. Судовае разьбіральніцтва вось ужо тры тыдні рухаецца тэмпамі чарапахі. Паседжаньні ці наогул адмяняюцца, ці, у горшым выпадку, дапытваюць аднаго-двух сьведак і разыходзяцца, таму дапытваць няма каго. Вельмі падобна на тое, што сьведкі баяцца зьяўляцца ў залі суда.

Як вядома, пракуратура ня здолела (ці не захацела) да канца раскрыць гэтае злачынства і толькі пад ціскам грамадзкасьці вымушана была перадаць нераскрытую да канца справу ў суд, прадставіўшы крымінальныя справы групы Ігнатовіча, як не датычныя да выкраданьня З.Завадзкага. Суд дапытвае сьведкаў толькі па крымінальных эпізодах. Да выкраданьня невядома каля яшчэ падыйдуць. У гэтым, як мне падаецца, і хаваецца сутнасьць аб’яднаньня справы З.Завадзкага з іншымі крымінальнымі эпізодамі.

А менавіта дзяржаўны абвінаваўца абавязаны прадстаўляць доказы (артыкул 293 пункт 5 КПК). Уладу пракуратура таксама мела дастаткова. Незабесьпячэньне яўкі сьведак абвінавачваньня вельмі падобна да наўмыснага зацягваньня пракуратурай судовага сьледзтва.

На жаль, даць чытачам своечасовы й падрабязны агляд хода судовага разьбіральніцтва не ўяўляецца магчымым з-за закрытасьці працэсу. Інфармацыю даводзіцца зьбіраць па крохах.