Журналістаў “Пагоні” будуць судзіць за ўдзел у акцыі супраць закрыцьця газэты :: Хартыя'97 :: Навiны

Адносна двух журналістаў гарадзенскай недзяржаўнай газэты “Пагоня” Анджэя Пісальніка і Паўла Мажэйкі, а таксама рэдактара газэты Мікалая Маркевіча складзеныя пратаколы аб адміністратыўным парушэньні – за правядзеньне несанкцыянаванага пікету ў абарону закрытай Вышэйшым гаспадарчым судом Беларусі газэты (артыкул 167-1 КаАП РБ). Акцыя прайшла 19 лістапада на вуліцы Савецкай у Гародні і сабрала больш за 100 ўдзельнікаў – журналістаў і чытачоў газэты, якія разгарнулі лёзунгі ў асуджэньне ўціску свабоды слова ў Беларусі.

Трох журналістаў пасьля заканчэння акцыі пратэсту запрасілі ў аддзел міліцыі Ленінскага раёну, дзе адносна іх былі складзеныя пратаколы аб адміністратыўным парвапарушэньні. Ужо 20 лістапада справы Анджэя Пісальніка і Паўла Мажэйкі будуць разглядацца ў судзе Ленінскага раёну Гародні. Суд над рэдактарам “Пагоні” Мікалаем Маркевічам пройдзе пазьней, пасьля ягонага вяртаньня з Польшчы. Адразу пасьля правядзеньня пікету Мікалай Маркевіч адправіўся ў гэтую краіну для сустрэчы з уплывовымі палітыкамі. Беларускі журналіст мае намер прапанаваць ідэю арганізацыі слуханьняў аб закрыцьці дэмакратычнай газэты і ўціску свабоды слова ў Беларусі.

Сёньня ў Вільні прадстаўнікі беларускай дыяспары таксама правялі пікет супраць закрыцьця газэты “Пагоня” перад будынкам, дзе ў гэтыя дні адбываецца паседжаньне палітычнага камітэту ПАСЭ.