Польшча будзе ўводзіць візы для беларусаў прыблізна праз 8-9 месяцаў :: Хартыя'97 :: Навiны

Падчас свайго нядаўняга візыту ў Швэцыю, новы міністар замежных справаў Польшчы Ўладзімеж Цімашэвіч упершыню заявіў, што ў хуткім часе Польшча ўвядзе для грамадзянаў усходніх краінаў-суседзей Польшчы, у тым ліку і для Беларусі вiзы. Верагодна, самы вялікі пэрыяд, напрацягу якога беларусы яшчэ могуць езьдзіць у Польшчу бяз візаў, складае ня больш чым 8-9 месяцаў.

“Польшча ў хуткім часе будзе ўводзіць візавы рэжым для сваіх усходніх суседзяў, аднак, мы будзем старацца зрабіць так, каб візы ім атрымаць было няцяжка”, -- заявіў напярэдадні падчас свайго візыту ў Швэцыю міністар замежных справаў Польшчы Ўладзімеж Цімашэвіч.

Міністар Цімашэвіч разам з прэм’ерам Швэцыі Горам Персэнам і сваёй шведзкай калегай Ганнай Лінд абмяркоўвалі праблемы пашырэньня Эўразьвязу. Пра канкрэтныя тэрміны ўвядзеньня візаў Уладзімеж Цімашэвіч не сказаў.

Так што хутка, каб паехаць у Польшчу, беларусам замест звыклых ваўчараў прыйдзецца набываць візы. Па словах супрацоўнікаў польскага МЗСу, больш-менш канкрэтны тэрмін увядзеньня візаў ведаў напэўна толькі сам міністар Цімашэвіч, аднак зараз ён знаходзіцца ў Брусэлі, дзе абмяркоўвае з чыноўнікамі Эўразьвязу далучэньне Польшчы да аб’яднанай Эўропы. Як вядома, паводле папярэдніх пагадненьняў, Польшча і яшчэ 9 краінаў Цэнтральнай Эўропы далучацца да Эўразьвязу 1 студзеня 2004 году. Да гэта часу візы будуць уведзеныя дакладна. У лістападзе наступнага году Эўразьвяз у сваім рапарце канчаткова паведаміць, хто з краінаў-кандыдатаў у неабходнай ступені падрыхтаваны да ўступленьня.

“Такім чынам, каб скончыць падрыхтоўку, мы маем 8-9 месяцаў часу”, -- заявіў у Стакгольме міністар Цімашэвіч. Натуральна, што адной з прычынаў гэтай падрыхтоўкі зьяўляецца ўзмацненьне ўсходняй мяжы Польшчы, якая праз 15 месяцаў будзе мяжой Эўразьвязу. Дарэчы, зараз беларусы замест ваўчараў змогуць набываць і польскія візы. У турыстычнай фірме віза на паўгады на шмат наведваньняў каштуе каля 20 даляраў. Пры гэтым, запрашэньне з Польшчы не патрабуецца.