БПСМ -- без сьвятла :: Хартыя'97 :: Навiны

Выправiць сытуацыю не дапамагае нават "свая рука" ў Адмiнiстрацыi прэзыдэнта Апошнiя працоўныя днi "патрыёты" правялi ў цемры. Уласнiк будынка па вулiцы К.Маркса, 40 -- Беларускi саюз моладзi - адключыў электрычнасьць на першым паверсе, які займае ЦК БПСМ. Такiм чынам гаспадары плянуюць прымусiць БПСМ аплацiць запазычанасьці па арэндзе памяшканьняў, якiя складаюць ужо дзесяткi мiльёнаў рублёў.

Пасьля непасьпяховых перамоваў лiдэра БПСМ Юрыя Салаўёва з першым сакратаром ЦК БСМ Алай Данiлавай, апошняя была выклiкана на гутарку ў будынак, якi знаходзiцца ў непасрэднай блiзкасьцi з прытулкам маладзёжных арганiзацыяў -- у Адмiнiстрацыю прэзыдэнта. Лiдэру БСМ прапанавалi адмовiцца ад свайго рашэньня ўзамен на... пагашэньне БПСМам сваiх жа камунальных плацяжоў. Пра аплату запазычанасьці па арэндзе, якi БПСМ не аплочвае з верасьня 1999 года, дзяржаўныя мужы размову не вялi.

Зразумела, што такi стан рэчаў не задаволiў уласнiка, i святло ў патрыётаў так i не зьявiлася. Так што зараз нi кавы папiць, нi ў кампутарныя гульнi пагуляць.

А пытаньне аб уласнасьцi на шматпакутны будынак, дарэчы, зноў усплыло ў судзе, нават нягледзячы на тое, што тэрмiн абскарджваньня апошняга рашэньня, вынесенага на карысьць Беларускага саюзу моладзi, скончыўся 22 жнiўня. На гэты раз пытаньнем уласнасьцi зоймецца Вышэйшы Гаспадарчы суд.