 | ПАЛIТЫКА | |
Калугін правеў галадоўку пратэсту
11:17, 26/11/2001
“Усё жыцьцё ён прысьвяціў працы, нікога ня бачыў: ні дому, ні дзяцей. А яго пасадзілі ў турму. Такую лухту яму прад’яўляюць у абвінавачавньні. Муж – самы сумленны ў сьвеце чалавек, а яго зрабілі ворагам народа. Муж зьехаў з дому ў адным касьцюме, у ім яго і забралі. Толькі на наступны дзень сын здолеў перадаць яму цёплыя рэчы, а дачка займалася пошукам адваката. Пра затрыманьне мужа стала вядома, калі дадому прыйшлі з вобшукам”, -- распавяла ў інтэрвію “Белорусской газете” жонка арыштаванага на днях дырэктара вытворчага аб’яднаньня “Атлант” Леаніда Калугіна Людміла Калугіна. 
Эўрапэйская супольнасьць працягвае патрабаваць ад Лукашэнкі выкананьня чатырох умоваў
11:16, 26/11/2001
Тое, што правядзеньне адносна Беларусі палітыкі ізаляцыі прызнана контрпрадуктыўным, ня сьведчыць пра адмаўленьне ад прад’яўленых да яе патрабаваньняў з боку эўрапэйскай супольнасьці. Пра гэта 26 лістапада падчас сустрэчы са старшынём “палаты прадстаўнікоў” Вадзімам Паповым заявіла кіраўнік працоўнай групы па Беларусі Парлямэнцкай Асамблеі АБСЭ Ута Цапф.
11:15, 26/11/2001
Сёньняшні дзень знаходжаньня ў Менску спэцыяльнай рабочай групы па Беларусі Парлямэнцкай Асамблеі АБСЭ ў складзе Уты Цапф і Урбана Аліна пачаўся зь дзелавога абеду з кіраўнікамі Беларускай асацыяцыі журналістаў. Прэзыдэнт БАЖ Жанна Ліцвіна, віцэ-прэзыдэнт Андрэй Бастунец і іншыя журналісты ахарактарызавалі сытуацыю з мас-медыя ў краіне як неадпаведную стандартам свабоды слова. Прадстаўнікі БАЖ прывялі шмат фактаў уціску ўладаў на незалежныя СМІ.
11:14, 26/11/2001
У складзе спэцыяльнай працоўнай групы па Беларусі Парлямэнцкай Асамблеі АБСЭ адбыліся кадравыя зьмены. Пра гэта карэспандэнту БелаПАН 26 лістапада паведаміў супрацоўнік сакратарыяту ПА АБСЭ Пол Лежандр, які зараз знаходзіцца ў Менску й суправаджае дэлегацыю спэцыяльнай працоўнай групы па Беларусі. Па ягоных словах, групу пакінулі Адрыян Севярын – страшыня ПА АБСЭ, Кіма Кільюнэн – намесьнік старшыні ПА АБСЭ і Ніно Бурджанідзэ, нядаўна выбраная сьпікерам парлямэнту Грузыі. Такім чынам, зараз у склад групы, як раней, уваходзяць ейны кіраўнік Ута Цапф (Нямеччына), Урбан Алін (Швэцыя) і Ігар Осташ (Украіна). Да іх далучыўся парлямэнтар з Партугаліі Антоніо Райш і кіраўнік парлямэнтараў Латвіі ў ПА АБСЭ Хэлена Дземакава.
11:13, 26/11/2001
Як стала вядома карэспандэнту “Саюз-інфо”, заплянаваных сустрэч Аляксандра Лукашэнкі з прадстаўнікамі вядомых СМІ ня будзе. Меркавалася, што падчас прыезду ў Маскву, беларускі прэзыдэнт будзе прымаць удзел у праграмах “Герой дня”, “Вести”, будзе даваць інтэрвію радыёстанцыі “Маяк” і правядзе сустрэчу з рэдактарамі буйных расейскіх газэтаў. Аднак праграма размоваў главы беларускай дзяржавы з расейскімі СМІ была некалькі падкарэктаванай і, у выніку, Аляксандар Лукашэнка будзе прымаць удзел толькі ў тэлеперадачы “Подробности”.
11:12, 26/11/2001, “Белорусская газета”
За звальненьнем з пасады начальніка ДАІ МУС палкоўніка міліцыі Аляксея Чуднікава падаў у адстаўку начальнік Менскай дзяржаўтаінспэкцыі палкоўнік Анатоль Сідарэня. На гэтай пасадзе ён прабыў больш за 10 гадоў. Даведацца пра прычыны адстаўкі галоўнага “даішніка” сталіцы аказалася справаю на рэдкасьць праблематычнай. Яно і зразумела: бо размова йшла пра гонар высокіх супрацоўнікаў далёка не шэраговага сілавога ведамства, якім сёньня зьяўляецца МУС.
11:11, 26/11/2001
У адпаведнасьці з пастановаю Савету Міністраў Беларусі з 1 сьнежня гэтага году мінімальны памер заробку ў рэспубліцы складзе 10 тыс. беларускіх рублёў. Павышэньне закране работнікаў арганізацыяў, што фінансуюцца з бюджэту і карыстаюцца дзяржаўнымі датацыямі. Для дадзенай катэгорыі працоўных тарыфная стаўка 1-га разраду складзе 19 500 рублёў, а штомесячныя даплаты да акладаў, што тарыфіцыруюцца 1-11 разрадамі, зараз, як адзначаецца ў пастанове Савміну, усталёўваюцца ў памерах 18-20 тыс. рублёў.
11:10, 26/11/2001
Асноўнымі праблемамі магілёўскага абласнога прадпрыемства “Аблгаз” зьяўляюцца дэбіторскія пазыкі й бартэрныя разьлікі. З пачатку года спажыўцы запазычылі прадпрыемству каля 18 мільярдаў рублёў. З восені на рахунках "Аблгазу" “жывымі” грашыма ў якасьці платы за паслугі паступае толькі 10 адсоткаў ад іх кошту. Астатнія разьлікі вядуцца па схеме ўзаемаразьлікаў ці па бартэру.
11:09, 26/11/2001
Міжнародная канферэнцыя “Беларусь пасьля выбараў: неабходнасьць пераменаў (эканоміка, палітыка, бясьпека, ідэнтычнасьць)” прайшла ў Менскім міжнародным адукацыйным цэнтры 23-25 лістапада. Арганізатарамі форуму выступілі Аналітычны цэнтар “Стратэгія”, Фонд імя Фрыдрыха Эбэрта, Германа-беларускае таварыства па вывучэньню Ўсходняй Эўропы. У міжнароднай канферэнцыі прымалі ўдзел палітыкі, вучоныя, бізнэсоўцы зь Беларусі, Нямеччыны, прадстаўнікі міжнародных арганізацыяў, замежныя дыпляматы, акрэдытаваныя ў Менску. На канферэнцыю прыбыла і новы кіраўнік працоўнай групы па Беларусі Парлямэнцкай Асамблеі АБСЭ Ута Цапф. Удзел у форуме прымаў і кіраўнік Кансультатыўны-назіральнае групы АБСЭ Ганс-Георг Вік, які на другі дзень форуму заявіў пра свой хуткі сыход з пасады главы КНГ АБСЭ ў Беларусі. Вітаньне форуму даслаў Вярхоўны прадстаўнiк Эўразьвязу па зьнешняй палітыцы Хаўер Салана. У ім ён адзначыў, што Беларусь абавязкова зойме сваё месца ў свабоднай Эўропе.
11:08, 26/11/2001
Кіраўнік Кансультатыўна-назіральнае групы АБСЭ ў Беларусі Ганс-Георг Вік пакіне Беларусь да канца гэтага году. Упершыню пра гэта Ганс-Георг Вік аб’явіў на прыёме ў Міжнародным адукацыйным цэнтры ў Менску 24 лістапада. Пасол Вік заявіў, што рашэньне не заставацца ў Беларусі яшчэ на адзін тэрмін – гэта яго асабістае рашэньне, і на яго ніяк не паўплывалі тыя абвінавачваньні ў адрас КНГ АБСЭ і яго асабіста, якія не адзін раз выказваў Аляксандар Лукашэнка. Гледзячы на дастаткова рэзкія выказваньні ў адрас беларускх уладаў, кіраўнік КНГ АБСЭ з’язджае зь Менску вельмі расчараваным. Пасол Вік выказаў вельмі жорсткую пазыцыю адносна прэзыдэнцкіх выбараў у Беларусі і заявіў, што варта вельмі асьцярожна ставіцца да афіцыйных вынікаў выбараў, паколькі ў Беларусі ўлады фактычна стварылі сыстэму маніпуляцыяў. І сёньня кіраўнік КНГ АБСЭ ня ў стане назваць сапраўдныя вынікі прэзыдэнцкіх выбараў у Беларусі, паколькі ніводзін незалежны назіральнік ня быў дапушчаны да падліку галасоў: “У выніку ўдасканаленьняў, дасягнутых у манеры правядзеньня выбараў пад жорсткім дзяржаўным кантролем, працэдуру фальсыфікацыі стала немагчымым назіраць – за выключэньнем той адлегласьці да сталоў для падліку бюлетэняў, на якім разьмяшчалі назіральнікаў на ўсіх практычна назіральных участках”.
11:07, 26/11/2001
Былы прэм’ер-міністар Беларусі Міхаіл Чыгір лічыць, што ўзбуджэньне крымінальнае справы й затрыманьне генэральнага дырэктара вытворчага аб’яднаньня “Атлант” Леаніда Калугіна зьяўляецца звычайнай акцыяй запужваньня кіраўнікоў буйных прадпрыемстваў. “Я думаю, вынік расьсьледаваньня будзе такім самым, як і ў справе дырэктарату Беларускага металургічнага завода Феакцістава, якога, пратрымаўшы некалькі месяцаў у сьледчым ізалятары, выпусьцілі”, -- сказаў Чыгір. Ён ня выключыў, што такія жорсткія дзеньяні ўладаў адносна Калугіна выкліканыя ягоным удзелам у прэзыдэнцкай кампаніі.
11:06, 26/11/2001
З наведваньня Кансультатыўнай Рады апазыцыйных палітычных партыяў 25 лістапада пачаўся візыт у Беларусь дэлегацыі спэцыяльнай працоўнай групы па Беларусі Парлямэнцкай Асамблеі АБСЭ. У ейны склад увайшлі новы старшыня групы Ута Цапф (Нямеччыну) і член групы Урбан Алін са Швэцыі. Па словах Уты Цапф, мэта візыту заключаецца ў вывучэньні сапраўднай сытуацыі ў Беларусі. “Нам прыйдзецца даць ацэнку сытуацыі ў краіне праз два з паловаю месяцы пасьля выбараў”, -- адзначыла кіраўнік групы. Яна таксама нагадала, што ў лютым 2002 году адбудзецца паседжаньне Сталага камітэту ПА АБСЭ. Менавіта гэты камітэт шмат у чым вызначае статус той ці іншай дэлегацыі ў Парлямэнцкай Асамблеі АБСЭ. Нагадаем, што на сёньня адносна парлямэнту Беларусі тут пануе канцэпцыя пустога крэсла – паўнамоцтвы Вярхоўнага Савету 13-га скліканьня, на думку Сталага камітэту, ужо завяршыліся, а “палата прадстаўнікоў” не была выбранай дэмакратычным шляхам.
11:05, 26/11/2001, «Наша Свабода»
24 лістапада 1996 года ў Беларусі адбыўся агульны рэферэндум, ініцыяваны Аляксандрам Лукашэнкам. Дзякуючы яму, беларускі кіраўнік гвалтоўна зьмяніў беларускую Канстытуцыю, разагнаў парлямэнт, штучна падоўжыў свой тэрмін знаходжаньня на прэзыдэнцкай пасадзе й сканцэнтраваў у сваіх руках усе магчымыя й немагчымыя паўнамоцтвы.
11:04, 26/11/2001
Па словах старшыні БГК Тацяны Процькі, прыняцьце праэкту новага закону “Аб свабодзе сумленьня і рэлігійных арганізацыяў” непазьбежна прывядзе да распальваньня рэлігійнай нецярпімасьці й варожасьці. Пра гэта 23 лістапада праваабаронца заявіла ў Менску на паседжаньні “круглага стала”, які прайшоў у Рэспубліканскім палацы прафсаюзаў пры арганізацыі прэс-службы саюзу хрысьціянаў веры эвангельскай у Беларусі. “Гэты таталітарны закон не прадугледжвае асабістай свабоды чалавека, паколькі ён прапісвае права на ажыцьцяўленьне веравызнаньня толькі для групы грамадзянаў у колькасьці 20 і больш чалавек. Закон унутрана супярэчлівы”, -- заявіла Процька.
11:03, 26/11/2001
Прыход расейскага капіталу ў Беларусь ня зьменіць макраэканамічную сытуацыю ў краіне. Пра гэта заявіў 25 лістапада ў Менску прадстаўнік Інстутуту Эўропы Расейскай Акадэміі навук Аркадзь Мошэс падчас дыскусіі на міжнароднай канферэнцыі “Беларусь пасьля выбараў: неабходнасьць пераменаў”. Свой пункт погляду ён патлумачыў тым, што калі расейскі капітал прыдзе на Беларусь і будзе тут працаваць, то толькі на ўмовах, прапанаваных дзейнымі ўладамі. Тое самае, па ягоных словах, будзе, напрыклад, і зь нямецкім капіталам. Калі б у Беларусі дзейнічалі агульнапрынятыя нормы разьвіцьця ў эканоміцы, усё было б па-іншаму, адзначыў Мошэс.
11:02, 26/11/2001
Для рэалізацыі праграмы “Саюзны тэлевізар” Расея й Беларусь выдзяляць крэдыт у памеры 100 мільёнаў рублёў. Пра гэта ў пятніцу паведаміў у Варонежы дзяржсакратар “саюзу” Беларусі й Расеі Павал Барадзін. Ён прыняў удзел у нарадзе, прысьвечанай пытаньням рэалізацыі гэтай міждзяржаўнай праграмы, у якой актыўны ўдзел прымаюць два варонежскіх прадпрыемства – ААТ “ВЭЛТ” і ААТ “Відэяфон”. Разам з тым Павал Барадзін адзначыў, што для пасьпяховай рэалізацыі дадзенага праэкту, зацьверджанага выканкамам “саюзу” 9 сьнежня 1998 году (выпуск 6-8 мільёнаў айчынных тэлевізараў на год), патрабуецца крэдытаваньне прадпрыемстваў у памеры 32 мільёнаў даляраў.
11:01, 26/11/2001
Па дадзеных Міністэрства фінансаў Беларусі, у студзені-кастрычніку 2001 году ў бюджэт дзяржавы паступіла 4 трлн. 585,9 млрд. рублёў даходаў. Зь іх на дададзеную вартасьць, падаткаў на даходы, акцызаў і падаходнага падатку прыпадае 54,3 адсоткі. Пры гэтым чвэрць усіх паступленьняў у бюджэт забясьпечана за кошт падатку на дададзеную вартасьць. У той самы час, па дадзеных Міністэрства па падатках і зборах, на 1 лістапада запазычанасьць па плацяжох у бюджэт склала 125,3 млрд. рублёў.
| |
|
, iнформэр
