Вік з’язджае зь Беларусі вельмі расчараваным :: Хартыя'97 :: Навiны

Кіраўнік Кансультатыўна-назіральнае групы АБСЭ ў Беларусі Ганс-Георг Вік пакіне Беларусь да канца гэтага году. Упершыню пра гэта Ганс-Георг Вік аб’явіў на прыёме ў Міжнародным адукацыйным цэнтры ў Менску 24 лістапада. Пасол Вік заявіў, што рашэньне не заставацца ў Беларусі яшчэ на адзін тэрмін – гэта яго асабістае рашэньне, і на яго ніяк не паўплывалі тыя абвінавачваньні ў адрас КНГ АБСЭ і яго асабіста, якія не адзін раз выказваў Аляксандар Лукашэнка. Гледзячы на дастаткова рэзкія выказваньні ў адрас беларускх уладаў, кіраўнік КНГ АБСЭ з’язджае зь Менску вельмі расчараваным. Пасол Вік выказаў вельмі жорсткую пазыцыю адносна прэзыдэнцкіх выбараў у Беларусі і заявіў, што варта вельмі асьцярожна ставіцца да афіцыйных вынікаў выбараў, паколькі ў Беларусі ўлады фактычна стварылі сыстэму маніпуляцыяў. І сёньня кіраўнік КНГ АБСЭ ня ў стане назваць сапраўдныя вынікі прэзыдэнцкіх выбараў у Беларусі, паколькі ніводзін незалежны назіральнік ня быў дапушчаны да падліку галасоў: “У выніку ўдасканаленьняў, дасягнутых у манеры правядзеньня выбараў пад жорсткім дзяржаўным кантролем, працэдуру фальсыфікацыі стала немагчымым назіраць – за выключэньнем той адлегласьці да сталоў для падліку бюлетэняў, на якім разьмяшчалі назіральнікаў на ўсіх практычна назіральных участках”.

Ганс-Георг Вік таксама адзначыў, што ва ўсіх трох выпадках (мясцовыя, парлямэнцкія і прэзыдэнцкія выбары) эўрапейскія інстытуты, якія адсочвалі выбарчы працэс у Беларусі, прыйшлі да высновы, што выбары не адпавядалі стандартам АБСЭ. Знамянальна, заявіў Вік, што справаздача місіі доўгатэрміновых назіральнікаў асацыяцыі арганізатараў выбараў краінаў Цэнтральнай і Ўсходняй Эўропы ўтрымлівала крытычныя водгукі. Тым не менш, каб быць аб’ектыўным, сказаў пасол, неабходна адзначыць, што дэлегацыя СНД і прадстаўнікі краінаў-членаў СНД, а таксама асобныя палітычныя “турысты” з краінаў Эўропы далёкага замежжа далі пераважна пазытыўную адзнаку. Тым не менш, гэтыя групы выступалі як кароткатэрміновыя назіральнікі і, са словаў Віка, ня могуць выказваць правільную ацэнку мінулых прэзыдэнцкіх выбараў у Беларусі.

Кіраўнік АБСЭ заявіў, што для паляпшэньня статусу Беларусі ў эўрапэйскіх інстытутах, кіраўніцтву краіны неабходна ўнесьці зьмены ў выбарчы кодэкс, надзяліць значнымі паўнамоцтвамі парлямэнт, зьмяніць сытуацыю ў галіне СМІ і спыніць палітыку запужваньня апазыцыі й ейных прыхільнікаў. “Я ўсьведамляю – сказаў Вік, -- што Лукашэнка і ягоны ўрад мяркуе, што вырашылі дадзеныя пытаньні, і што ў краіне квітнее дэмакратыя. Улады ўяўляюць перспэктыву пераменаў у зносінах з Эўропаю пры ўмове, што статус Беларусі ў эўрапэйскіх інстытутах будзе ўзноўлены без якіх-небудзь “саступак” з боку Беларусі. Але эўрапэйскія інстытуты не падзяляюць такі пункт гледжаньня. Па маіх ацэнках, яны ня змогуць прызнаваць штосьці, што ня мела месца – у прыватнасьці, правядзеньне выбараў у адпаведнасьці са стандартамі АБСЭ”.

Хто стане ягоным пераемнікам, Ганс-Георг Вік да гэтага часу ня ведае. Па ягоных словах, у бліжэйшы час гэта павінен вызначыць дзейсны старшыня АБСЭ. Адносна сябе, Вік дадаў, што ў рамках дзейнасьці Місіі ў адпаведнасьці са стандартамі АБСЭ ён карыстаўся і працягвае карыстацца падтрымкаю дзейснага старшыні, аднак ён праінфармаваў старшыню й кіраўніка Нямеччыны аб тым, што ён не хацеў бы працягваць выкананьне сваіх абавязкаў больш чым на чатыры гады.