“Канал стагоддзя” праз Беларусь за 5 мільярдаў даляраў :: Хартыя'97 :: Навiны

Латвія, Беларусь і Ўкраіна разглядаюць магчымасьць аднаўленьня гандлёвага шляху “з варагаў у грэкі” – кошт “каналу стагоддзя” можа пераўзысьці 5 млрд. даляраў. Як перадае карэспандэнт РІА "Новости", магчыма, што ў недалёкай будучыні гандлёвыя шляхі з паўночных і паўночна-заходніх краінаў на поўдзень зноў, як у ІХ-ХІ ст., пойдуць не вакол Эўропы, а наўпрост з Балтыйскага мора ў Чорнае і далей ў Міжмор’е. Такую магчымасьць прадугледжвае праэкт “Транзытны шлях Даўгава-Дняпро”. Ён прадугледжвае злучэньне каналам дзьвюх рэк, адна з якіх упадае ў Балтыйскае, а другая ў Чорнае мора, і тым самым стварэньне транзытнага вадзянога шляху даўжынёй 2 тыс. 330 кілямэтраў. Паводле папярэдніх разьлікаў, агульны кошт пераўзыйдзе 5 млрд. даляраў ЗША.

Згодна праэкту, распрацаванаму латвійскімі спэцыялістамі з ініцыятывы міністэрства зносінаў краіны, неабходна будзе пабудаваць чатыры гідравузлы на Заходняй Дзьвіне і 13 на Дняпры, усталяваць шлюзы на трох дзейсных ГЭС “Даўгаўскай каскады”, прарыць 80-кілямэтровы канал паміж Віцебскам і Воршаю, які зьвяжа Даўгаву й Днепр. Прыйдзецца таксама пашырыць і паглыбіць вытокі гэтых рэк, каб па іх маглі праходзіць судны перш з водазьмяшчэньнем у 5 тыс. тонаў, а ў будучым – і болей.

У выпадку ажыцьцяўленьня праэкту, Украіна спадзяецца водным шляхам экспартаваць у Канаду свой метал, а праз латвійскую частку каналу штодгод будуць перавозіць каля 120 млн. тонаў розных тавараў. У 2002 годзе праэкт “Даўгава-Днепр” будзе разглядацца на ўзроўні ўрадаў Латвіі, Украіны й Беларусі.

Прынцыповую гатоўнасьць прымаць удзел у фінансаваньні “каналу стагоддзя” ужо выказалі буйны Латвійскі камэрцыйны банк “Парэкс”, а таксама два заходнія інвэстары -- кампанія “Інвестмэнтс энд Эдвайс", заснавальнікам якой зьяўляецца ісляндзкі ўрад, і люксамбургскі "Каўпсінг інвэстмэнт Бэнк".