Партнёры «Атланту» з Расеі абараняюць Калугіна :: Хартыя'97 :: Навiны

Прадстаўнікі расійскіх фірмаў і кампаніяў - афіцыйных дылераў менскага ЗАТ "Атлант" у Цэнтральным рэгіёне Расейскай Федэрацыі (Масква й Маскоўская вобл.) зьвярнуліся зь лістом у рэдакцыю інтэрнэт-выданьня "Союз-инфо" ў сувязі з узбуджэньнем крымінальнай справы ў дачыненьні прэзыдэнта ЗАТ Леаніда Калугіна й зьмяшчэньнем яго пад варту. Яны называюць узбуджэньне крымінальнае справы супраць Калугіна “памылкай”.

"Ужо некалькі гадоў узаемавыгаднага і плённага супрацоўніцтва зьвязваюць нас з Менскім заводам халадзільнікаў, - гаворыцца ў лісьце. - Устойлівы попыт на халадзільнікі, спачатку з гандлёвай маркай "Мінск", а зараз - "Атлант", існуе ўжо больш за 40 гадоў…

Складнікі поьспеху непарыўна зьвязаны з імем генэральнага дырэктара Менскага заводу халадзільнікаў ЗАТ "Атлант" Леаніда Іванавіча Калугіна. Леанід Іванавіч клапоціцца не толькі аб сацыяльнай падтрымцы (на заводзе вырашана жыльлёвая праблема), але і аб духоўнай спадчыне работнікаў, вядзе вялікую дабрачынную дзейнасьць. За яе ён быў указам патрыярха Маскоўскага і Ўсяе Русі Алексія II узнагароджаны ордэнам сьвятога роўнаапостальнага вялікага князя Ўладзімера.

Ведаючы пра тую ўвагу і клопат, з якімі ў Беларусі адносяцца да айчыннай прамысловасьці, упэўнены ў хуткім і законным вырашэньні сытуацыі, зьвязанай з прад`яўленьнем супраць Л.Калугіна абвінавачаньняў у злачыннай дзейнасьці. Лічым, што адбылося непаразуменьне, і верым у справядлівасьць і розум прэзыдэнта Рэспублікі Беларусь, які абавязкова расставіць усе кропкі над "i" і правядзе бесстаронняе расьсьледаваньне інцыдэнту…

Ліст падпісаны прадстаўнікамі фірмаў і кампаніяў "Арыстон", "Атлант-Цэнтр", "Білкон-М", "Касіс", "Прастора", "Протар", "ТТК" і "ТДК Эдыл".