Віктар Шэйман не жадае сустракацца з Зінаідай Ганчар? :: Хартыя'97 :: Навiны

“Народная воля” ўжо пісала аб тым, што жонка Віктара Ганчара, пасьля таго як у прэсе апублікавалі рапарты генэрала Лапаціка й палкоўніка Алкаева, цьвёрда вырашыла сустрэцца з высокапастаўленымі персонамі, чые прозьвішчы згадваюцца ў дакумэнтах і пазначаны “Сов.секретно”. Прыкладна чатыры месяцы таму Зінаіда напісала ліст з просьбай аб сустрэчы генэральнаму пракурору Беларусі Віктару Шэйману.

За некалькі тыдняў да прэзыдэнцкіх выбараў атрымала стандартную адпіску ад начальніка сакратэрыяту -- старэйшага памочніка генпракурора Сяргея Краўцова, дзе было напісана:

“...правяралася вэрсія аб выкраданьні Вашага мужа ў сувязі з ягонай палітычнай дзейнасьцю, аднак яна не знайшла свайго пацьверджаньня. На дадзены час па гэтай справе ажыцьцяўляецца комплекс сьледчых і аператыўна-вышукных мерапрыемстваў. Расьсьледаваньне справы знаходзіцца на кантролі ў Главы дзяржавы.

Пацьверджаньне аб тым, што ў некаторых сродках масавай інфармацыі апублікаваныя дакумэнты, у якіх В.В.Шэйман абвінавачваецца ў выкраданьні Вашага мужа, не адпавядае рэчаіснасьці.

Па ўказаньні Генэральнага пракурора Рэспублікі Беларусь вас запросяць на сустрэчы з імі падчас чарговага прыёму грамадзян. Пра дату й час Вас папярэдзіць аддзел арганізацыі працы са зваротамі грамадязнаў рэспубліканскай пракуратуры”.

З таго часу прайшло амаль тры месяцы. Аднак ад Шэймана адказу няма...

У пракуратуру паведамілі, што Віктар Шэйман прымае грамадзянаў кожную трэцюю сераду кожнага месяца з папярэдняга запісу.

У пачатку жніўня, нягледзячы на прадвыбарчую мітусьню, Шэйман правёў прыём наведвальнікаў.

У верасьні генпракурор народ не прымаў. У пачатку верасьня ў Віктара Ўладзімеравіча было вельмі шмат справаў, пасьля сканчэньня якіх ён накіраваўся ў законы адпачынак. З адпачынку вярнуўся 15 кастрычніка.

26 кастрычніка В.Шэйман сустракаўся з жыхарамі Берасьці.

У гэтым месяцы прыём пакуль не адбыўся. Супрацоунікі пракуратуры тлумачаць гэта надзвычай шчыльным працоўным графікам свайго боса. Хоць, кажць, ужо складаюць сьпіс тых, з кім Шэйман будзе размаўляць у сьнежні. На жаль, не давялося даведацца, ці ёсьць там прозьвішча жонкі Ганчара. З журналістамі генпракурор кантактуе выключна праз пасярэднікаў – памочнікаў і прэс-службы, а яны па гэтым пытаньні ніякіх тлумачэньняў даць ня могуць. Прэс-канферэнцыяў Шэйман ня ладзіць. Дарэчы, экс-генпракурор Алег Бажэлка, пры ўсёй сваёй закрытасьці, з журналістамі сустракаўся раз на тры месяцы. І адказваў на любыя пытаньні.

“Некаторыя называюць Шэймана добрым псыхолягам, -- кажа Зінаіда. – Але ягоныя паводзіны ў дадзенай сытуацыі, на мой погляд, кажуць толькі пра адно... калі віноўны, заўсёды цяжка глядзець у вочы людзям. Мне яшчэ экс-старшыня КДБ Уладзімер Мацкевіч падчас нашай сустрэчы казаў пра тое, што Віктар Уладзімеравіч ніколі не пагодзіцца паразмаўляць са мной”.

І яшчэ. Крыўдна, што, эксплюатуя тэму зьніклых, некаторыя кандыдаты ў прэзыдэнты адпрацавалі так амаль усю выбарчую кампанію. А пасьля выбараў пра гэта ні гука. І наогул іх не чуваць і не відаць. А яшчэ лезьлі ў прэзыдэнты...