Касьцёл Вітаўта ўзарвалі, мітынг забаранілі :: Хартыя'97 :: Навiны

В четверг исполнилось 40 лет, как в Гродно был взорван костел Фара У чацьвер спаўняецца 40 гадоў, як у Гародні быў узарваны касьцёл Фара Вітаўта. З гэтай нагоды група гарадзенцаў падала ў гарвыканкам заяўку на правядзеньне мітынгу "Бяз гісторыі - няма будучыні" паблізу плошчы Савецкай, на месцы, дзе стаяў касьцёл, 29 лістапада а 17-ай гадзіне. Улады не дазволілі ўшанаваць загублены храм.

Фару Вітаўта, пабудаваную на сродкі князя Вітаўта на пачатку 15-га ст., сёньня можна пабачыць толькі на фотаздымках. Ён быў на той час драўляным і самым вялікім у ВКЛ. Пазьней яго некалькі разоў перабудоўвалі. На пачатку 20-х гг. касьцёл перабудоўваўся на царкву, потым - зноў станавіўся касьцёлам.

Гарадзенскія ўлады ў ноч з 28 на 29 лістапада 1961 году ўзарвалі храм. Дзеля гэтага зь Ленінграду прыехала цэлая брыгада вайскоўцаў і былі прывезеныя 2 тоны выбуховага рэчыва. Цэлы месяц сьвідравалі ў фундамэнце дзіркі й закладвалі ўзрыўчатку. Пасьля выбуху храм асеў, а крыж уваткнуўся ў зямлю й застаўся стаяць. Вялізную гару абломкаў прыбралі за 2 дні.

Наступным павінен быў быць узарваны Езуіцкі касьцёл, але вернікам удалося яго адстояць. Некалькі гадоў таму на месцы Фарнага касьцёлу быў усталяваны вялікі крыж зь бела-чырвона-белымі стужкамі. Аднак празь некалькі дзён па загаду ўладаў ён быў выкапаны.

Цікава, што паведамілі гарадзенцам аб забароне на правядзеньне мітынгу ў міліцыі, а не ў гарвыканкаме, хоць падпісаны дакумэнт новым старшынём гарвыканкаму Антоненкам.