Падаткавы кодэкс узмацняе ўціск дзяржавы на прадпрымальнікаў :: Хартыя'97 :: Навiны

Падаткавы кодэкс у яго сяньняшнім выглядзе не адпавядае дэкляраванай кіраўніцтвам краіны палітыцы лібералізацыі эканомікі. Больш за тое, ён узмацняе ўціск дзяржавы на прадпрымальнікаў і дзяржаўны кантроль за дзейнасьцю суб’ектаў гаспадараньня. Такое меркаваньне ад імя экспэртаў аналітычнай групы рэспубліканскага грамадзкага аб’яднаньня “Альтэрнатыва XXI” выказаў БелаПАН старшыня выканкаму гэтай арганізацыі Сяргей Балыкін у камэнтары прыняцьця палатай прадстаўнікоў у першым чытаньні праекту агульнай часткі Падаткавага кодэксу.

Сярод асноўных заўваг экспэртаў да праэкту дакумэнту Балыкін вылучыў наступныя: Падаткавы кодэкс дазваляе прымаць нарматыўныя акты, якія пагаршаюць становішча юрыдычных асобаў заднім чыслом, ён прадстаўляе права ня толькі парлямэнту, але й прэзыдэнту зьмяняць заканадаўства, што можа прывесьці да нестабільнасьць падаткавай сыстэмы. Падаткавы кодэкс усталёўввае няроўнасьць падаткаплацельшчыкаў і падаткавых органаў на карысьць апошніх – надае падаткавым органам надзвычай шырокія паўнамоцтвы. У прыватнасьці, як адзначыў Балыкін, захавалася права падаткавых органаў на пазасудовую канфіскацыю грашовых сродкаў, у тым ліку наяўных. Гэтае становішча выклікала ў экспэртаў неразуменьн, паколькі зусім нядаўна Лукашэнка адмяніў свой дэкрэт №40, які надаваў яму права пазасудовай канфіскацыі маёмасьці, сказаў Сяргей Балыкін. “Тое ж права замацавана ў Падаткавым кодэксе, прычым яно надаецца значна большаму колу асобаў – кіраўнікам раённых падаткавых інсьпекцыяў”, -сказаў ён.