Сусьсветны банк не гатовы страхаваць рызыкі інвестараў у Беларусі :: Хартыя'97 :: Навiны

Структурнае падразьдзяленьне Сусьветнага банка Multilateral Investment Guarantee Agency (MIGA), пакуль не гатовае страхаваць рызыкі замежных інвестараў у Беларусі, заявіў віцэ-прэздэнт MIGA Ангус Скрымжу на прэс-канферэнцыі ў Менску. Па ягоных словах, толькі ажыцьцяўленьне беларускім урадам рэформаў у сфэры рэгуляваньня правоў уласнасьці, а таксама ўтварэньня коштаў й падаткаабкладаньня дазволіць агенцтву далучыццца да працэсу прыцягненьня замежных інвестыцыяў у краіну.

“Прынцыповаю ўмоваю MIGA зьяўляецца рэгуляваньне ў краіне працэсу перадачы правоў распараджэньня зямлёй і асноўнымі фондамі. Гэты першы этап рэформаў можа ажыцьцявіцца пры падтрымцы Сусьвтнага банку й ягонага падразьдзяленьня – Міжнароднай фінансавай карпарацыі”, -- адзначыў А.Скрымжу.

Другім этапам у працэсе прыцягненьня замежных інвестыцыяў, па ягоных словах, павінна стаць шырокае інфармаваньне міжнароднай эканамічнай супольнасьці аб апошніх зьменах.

На трэцім этапе ў краіне павінны пасьпяхова ажыцьцяўляцца некалькі буйных інвестыцыйных праектаў з удзелам замежнга капіталу, якія будуць служыць прыкладам для іншых замежных інвестараў.

“MIGA гатовы сваімі дзеяньнямі падтрымаць крокі, якія ўрад Беларусі будзе прадпрымаць на другім і трэцім этапах”, -- падкрэсьліў віцэ-прэзыдэнт агенцтва.

Multilateral Investment Guarantee Agency, якое было створана ў 1998 годзе ў структуры Сусьветнага банку, страхуе інвестараў-нерэзыдэнтаў ад некамэрцыйных і палітычных рызык, такіх, як адмена канвертуемасьці валюты, нацыяналізацыя, нестабільнасьць у грамадзтве і парушэньне ўрадам краіны кантрактных абавязацельстваў перад інвестарам.

Агенцтва таксама аказвае кансультатыўныя паслугі ўрадам па прыцягненьні прыватных інвестыцыяў і распаўсюду інфармацыі аб інвестыцыйных магчымасьцях у краінах з пераходнай эканомікай.