ЗУБР сустракаецца з польскай моладзьдзю :: Хартыя'97 :: Навiны

У Варшаве прайшла сустрэча польскай моладзі зь лідэрамі маладзёвых партыяў і грамадзкіх арганізацыяў. У сустрэчы ўдзел прымалі лідэры руху ЗУБР і Маладога Фронту. Прысутныя, а гэта былі ў асноўным польскія студэнты, цікавіліся цяпершняй палітычнай сытуацыяй у Беларусі і ўплывам, які на яе маюць маладзёвыя апазыцыйныя арганізацыі. Па словах гасьцей зь Беларусі, папулярнасьць іхніх арганізацыяў у краіне расьце, а гэта значыць, што цяперашняе беларускае кіраўніцтва ня мае шанцаў на падтрымку з боку моладзі.

У інтэрвію Радыё Свабода актывіст руху ЗУБР Уладзімер Кобец заявіў наступнае: “Сярод моладзі ад 18 да 25 гадоў за Лукашэнку галасавалі лічаныя адсоткі, у той час як супраць яго галасавала пераважная большасьць моладзі – больш чым 60%. Гэта паказвае, што дыктатура ня мае будучыні”.

Падчас сустрэчы амаль усе беларускія госьці казалі аб неабходнасьці больш цеснага супрацоўніцтва з маладзёвымі грамадзкімі рухамі й палітычнымі партыямі замежных кріанаў, у тым ліку Польшчы, якая мае каштоўны досьвед барадзьбы з камуністычнай дыктатураю.

У супрацоўніцтве зацікаўленыя й палякі. Як сказаў Радыё Свабода вядучы сустрэчы, вядомы публіцыст часопісу Newsweek Воцэх Маязэрскі, тое, шо адбываецца ў Беларусі, зьяўляецца ледзь не дакладным адбіткам польскіх падзеяў 20-гадоўвай даўніны, і таму палякі з непакоем сочаць за тым, што адбываецца за іх усходняй мяжой.