Вы находитесь на старой версии сайта "Хартия'97 - НовостиБеларуси". Замените, пожалуйста, адрес сайта Хартии в закладках. Для перехода на новый сайт нажмите здесь.
Узбуджана крымінальная справа па факце вандалізму ў Курапатах 11:10, 06/12/2001
Сьледчыя Менскага раёну пачалі допыты сьведкаў па крымінальнай справе ў сувязі з разбурэньнем мэмарыяльнага знака, так званай “Лаўкі Клінтана” ў Курапатах. Сьледчыя прыехалі ў штаб-кватэру БНФ і дапыталі па гэтай справе ў якасьці сьведкаў некалькі членаў БНФ і лідэра Маладога Фронту Паўла Севярынца. Міліцыю цікавіла думка абаронцаў Курапатаў адносна барбарскай акцыі. Заўважны той факт, што сьледчыя дзеяньні па крымінальнай справе пачаліся амаль праз 3 месяцы пасьля разбурэньня памятнага знака.
Сьледчыя дзеяньні каля Курапатаў нечакана актывізаваліся, й гарадзкая міліцыя ўчора выклікала кіраўніка міжнароднай камісіі Маладога Фронту Сяржука Лісічонка на размову па справе сутыкненьня абаронцаў Курапатаў зь менскім АМАПам. Справа ў тым, што Сяржук Лісічонак, якому амапаўцы падчас вядомых сутыкненьняў 8 лістапада разьбілі галаву, падаў скаргу ў пракуратуру на дзеяньні АМАПу.
Старшыня Маладога Фронту Павал Севярынец расцаніў гэтыя дзеньні як вынік палітычнай каньюктуры, жаданьне адначасова зрабіць рэверанс у бок Амэрыкі ў новым геапалітычным становішчы і згладзіць грамадзкі шок, выкліканы разбурэньнем Курапатаў.
Яшчэ адну прычыну актыўнасьці міліцэйскіх сьледчых маладафронтаўцы бачаць у пэрспэктыве магчымай адстаўкі міністра ўнутраных справаў Уладзімера Навумава. Па некаторых зьвестках, скандалы вакол Курапатаў могуць стаць падставаю для таго, каб зьняць Навумава.
