Лукашэнка адмовіўся памілаваць прафэсара Бандажэўскага :: Хартыя'97 :: Навiны

Аляксандар Лукашэнка адмовіўся памілаваць прафэсара Юрыя Бандажэўскага, які месяц таму зьвярнуўся да яго з адпаведнай просьбаю. Адказ на просьбу аб памілаваньні Юры Бандажэўскі атрымаў ад Аляксандра Лукашэнкі ў менскай калёніі, дзе ён правёў ужо 5 месяцаў паводле прысуду за хабарніцтва. Сваякі Бандажэўскага сьцьвярджаюць, што ў адказе з канцылярыі адміністрацыі Аляксандра Лукашэнкі "ляканічна паведамляецца пра тое, што просьба аб памілаваньні не задаволеная, а тлумачэньняў ніякіх няма".

У камэтары Радыё Свабода адвакат Сяргей Цурко нагадаў, што Бандажэўскі не прызнаў сябе вінаватым у судзе і не павініўся ў просьбе аб памілаваньні. Цурко не выключае, што гэтая ўпартасьць ягонага падабароннага паўплывала на рашэньне кіраўніка дзяржавы.

“Калі ў жніўні паслы краінаў Эўразьвязу хадзілі ў наша Міністэрства замежных справаў прасіць за Бандажэўскага, ім адказалі: "Пра што гаворка? Няма ж звароту Бандажэўскага аб памілаваньні. Вось калі такі зварот будзе, тады і разгледзім". А цяпер вось такое рашэньне... Ня ведаю, чаму. Хутчэй за ўсё, гэта звычайныя гульні ўладаў", — мяркуе адвакат Бандажэўскага.

Амаль адначасова з адмовай у памілаваньні Юры Бандажэўскі атрымаў і адказ зь Вярхоўнага Суду на скаргу на прысуд. І тут таксама адмова. Вярхоўны Суд не пажадаў пераглядаць справу Бандажэўскага і пакінуў вынесены яму прысуд бязь зьменаў.

Між тым, адвакаты Юрыя Бандажэўскага настойваюць, што прафэсар не вінаваты. Яны заяўляюць, што працэс над ім і па сутнасьці, і фармальна быў праведзены з шэрагам парушэньняў — таму справа патрабуе перагляду.

Нагадаем, што прафэсар, былы рэктар Гомельскага медычнага інстытуту Юры Бандажэўскі быў асуджаны да васьмі гадоў турмы – нібыта за хабарніцтва. Між тым, праваабаронцы і апазыцыя ў Беларусі лічаць яго чарговай ахвяраю палітычнага рэжыму. Нагадаем, што Бандажэўскі вёў актыўную барацьбу з афіцыйнай палітыкай у чарнобыльскай вобласьці, у прыватнасьці, сваімі дасьледаваньнямі даказаў сьмяротную шкоду дозаў радыяцыі, якія атрымоўваюць жыхары раёнаў, якія афіцыйна прызнаюцца прыдатнымі для жыцьця.

Цяпер, паводле зьвестак ягоных абаронцаў, скаргу на прысуд Бандажэўскаму павінны разгледзець у Камітэце правоў чалавека ААН, які месьціцца ў Жэнэве. Адвакат сьцьвярджае, што скарга ў Жэнэву ўжо дасланая. У выпадку станоўчага рашэньня Камітэту ААН зьявіцца фармальная падстава зноў патрабаваць ад Вярхоўнага Суду Беларусі перагляду справы Юрыя Бандажэўскага.