Працоўныя прасілі міласьціну ў аблвыканкаме :: Хартыя'97 :: Навiны

Працоўныя магілёўскага буданічага трэсту №12 нязвыклым чынам пратэстуюць супраць нявыплаты ім заробку. І, бадай, атрымаюць сваё і здымуць з пасады свайго кіраўніка. У магілёўскім трэсьце №12 не выплочваюць заробак з кастрычніка. З ініцыятывы актывістаў свабоднага прафсаюзу Юры Новікава й Аляксея Паўлоўскага пададалі адпаведную заяву ў суд. Аднак магілёўскія прадстаўнікі Феміды разглядаць яе не сьпяшаліся. 12 сьнежня два дзесяткі працоўных прыйшлі ў калідор магілёўскага аблвыканкаму, каб запісацца на прыём да ягонага старшыні Барыса Батуры. Аднак дарогу ім перакрылі міліцыянты. Тады некалькі працоўных зьнялі шапкі і сталі прасіць міласьціну ў аблвыканкамаўскіх чыноўнікаў, якія праходзілі побач.

Адзін з міліцыянтаў адразу паведаміў пра пікантную сытуацыю сп. Батуру. Хутка да працоўных выйшаў памочнік старшыні сп.Варонін. Ён прапаноўваў выбраць тры-чатыры чалавекі, зь якімі ён будзе весьці перамовы. Працоўныя папрасілі запрасіць на размову журналістаў. Аднак карэспандэнтам Радыё Рацыя і Свабода не дазволілі прысутнічаць на перамовах.

Хвілін праз сорак і працоўных і журналістаў пагадзіўся прыняць намесьнік старшыні магілёўскага гарвыканкаму Дзюбайлаў. Ён паведаміў, што меў размову з кіраўніком трэсту №12 сп.Ваксманам, якому ў катэгарычнай форме было загадана выплаціць заробак. Дарэчы, былі выпадкі, калі сп.Ваксман выкарыстоўваў грошы прызначаныя для заробкаў на набыцьцё будматэрыялаў. Сп.Дзюбайлаў паведаміў працоўным, што ён не задаволены працай Ваксамана. Хутчэй за ўсё апошняму хутка давядзецца напісаць заяву аб звальненьні.