Лукашэнка “ператрахнул” Міністэрства абароны :: Хартыя'97 :: Навiны

Аляксандар Лукашэнка зрабіў шэраг кадравых прызначэньняў у Міністэрстве абароны. У выніку кадравых перастановак свае пасады пакінулі начальнік Войскамі супрацьпаветранай абароны генэрал Кастэнка і ягоны калега –былы галоўны лётчык, генэрал Булыгін. Кадравыя зьмены ў Міністэрстве абароны Беларусі адбыліся адначасова з рэфармаваньнем самога ваеннага ведамства ва ўзброеных сілах. Напрыклад, замест галоўнага штабу створаны Генэральны штаб. Вынікае, што рэформы ў штабе абмяжуюцца зьменай таблічкі. Да й кіраваць Генэральным штабам прызначаны былы начальнік Галоўнага штабу Сяргей Гурулёў.

А вось рэфармаваньне іншых структураў Міністэрства абароны суправаджлася кадравымі перастаноўкамі. Так у выніку аб’яднаньня Ваенна-паветраных сілаў і войскаў супрацьпаветранай абароны без пасадаў засталіся іхнія былыя кіраўнікі --адпаведна генэралы Булыгін і Кастэнка. Абодва залічаныя ў распараджэньне міністра абароны. Чым гэтыя генэралы не дагадзілі Лукашэнку, -- невядома. Здаецца, ніводзін з іх не даў падставаў сумнявацца ў лаяльнасьці да Лукашэнкі. Праўда, генэрал Кастэнка аднойчы публічна заявіў, што ім ніколі ня будзе камандаваць расейскі генэрал. Магчыма, гэта незалежнае выказваньне і паўплывала на далейшую кар’еру генэрала.

Зараз камандаваць беларускімі лётчыкамі й зянітчыкамі будзе Алег Пафераў, які раней займаў пасаду першага намесьніка начальніка Войскаў супрацьпаветранай абароны. Генэрал Пафераў, наогул імкнуўся трымацца ў цені свайго начальніка генэрала Кастэнкі – з прэсай амаль не кантактаваў. Затое новапрызначаны начальнік сухапутных войскаў Юры Партноў да новага прызначэньня быў памочнікам міністра абароны і вельмі часта выступаў з крытыкай пашырэньня NАТО на Ўсход. Напэўна, за такую пазыцыю яго і адзначыў Лукашэнка.