Лібералізацыя як рэклямны трук :: Хартыя'97 :: Навiны

Абвешчаная лібералізацыя беларускай эканомікі – усяго толькі набор прыгожых дэклярацыяў, запазычаных з падручнікаў па эканоміцы. Да рэальнага прасоўваньня ў бок рынкавай эканомікі яны ня маюць дачыненьня. Да такой высновы прыйшлі ўдзельнікі паседжаньня прэс-клюбу, наладжанай Міжнароднай фінансавай карпарацыяй у Менску. Асабліва добра гэта заўважна ў сфэры інвэстыцыйнай палітыкі. Інвэстарам шмат абяцаюць, але не даюць рэальных гарантыяў бясьпекі ўкладзеных капіталаў, паведамляе Радыё Рацыя.

У Беларусі быў прыняты Інвэстыцыйны кодэкс, адменены дэкрэт прэзыдэнта крэдытнай палітыкі. І прадстаўнікі Міністэрства эканомікі сьцьвярджаюць, што ўсё гэта павінна садзейнічаць прытоку інвэстыцыяў у краіну. Па словах Інэсы Марозавай з Дэпартамэнту па справах інвэстыцыяў Мінэканомікі, на айчынных прадпрыемствах ёсьць астранамічная колькасьць інвэстыцыйных ідэяў, але прыцягнуць інвэстараў ім не ўдаецца. У прагнозе сацыяльна-эканамічнага разьвіцьця краіны на 2002 год закладзена 500-600 млн. даляраў інвестыцыяў. Аднак і гэту невялікую для краіны суму прыцягнуць будзе вельмі складана. Рэальна, мяркуе спн. Марозава, у краіну прыйдзе да 250 млн. даляраў. Па ацэнках экспэртаў МФК, якія былі зробленыя яшчэ ў 1995 годзе, патрэба краіны ў інвестыцыях на самыя неабходныя патрэбы дасягне 50 млрд. даляраў. Для нармальнага разьвіцьця эканомікі краіны патрабуецца ня менш за 3 млрд. даляраў у год.

Прэзыдэнт Беларускага саюзу прадпрымальнікаў Аляксандар Патупа мяркуе, што такія грошы прыйдуць у краіну ня хутка, калі наогул калі-небудзь прыйдуць. На ягоную думку, нягледзячы на прыняцьце Інвестыцыйнага кодэксу і абяцаньне фінансавай амністыі, бізнэсоўцаў хвалюе адсутнасьць рэальных гарантыяў.