Паляваньне на прафесароў працягваецца :: Хартыя'97 :: Навiны

Прафесар Гарадзенскага медычнага унівэрсытэту Казімір Конкаль, які адседзіў за атрыманьне хабару 4 месяцы і 4 дні, адпушчаны на волю. Але ягонае месца ў сьледчым ізалятары заняў прарэктар гэтага ж унівэрсытэту Леанід Ківач. Леанід Ківач апынуўся ў СІЗА 20 верасьня, прыкладна за месяц да суда над Казімірам Конкалем. Абвінавачваньне тое самае – атрыманьне хабару.

Загадчыка кафедрай Гарадзенскага медунівэрсытэту Казіміра Конкаля ўзялі практычна адразу пасьля атрыманьня грошай – 22 чэрвеня гэтага году. І “дапамог” у гэтым адзін з пакістанскіх студэнтаў 6-га курса Наім Мухаммад. Па ягоных сьведчаньнях на сьледзтве, а пасьля і ў судзе, без хабару ён ня здолеў бы атрымаць станоўчую ацэнку на іспыце па факультэцкай тэрапіі і, адпаведна, не быў бы дапушчаны да дзяржаўных іспытаў. Супрацоўнікі гарадзенскага ўпраўленьня КДБ мелі намер узяць прафесара Конкаля з доказамі. Даляры, якія Мухамад уклаў у залікоўку (дзьве дваццаткі і адна дзесятка), былі папярэдне адзначаныя адмысловым рэчывам, які сьвеціцца ў промнях ультрафіялету. Прафесар гэтага ня ведаў, але падчас затрыманьня засьведчыў сваю імгненную рэакцыю: у хвіліну ён запіхнуў у рот тры амэрыканскія купюры, разжаваў і праглынуў. Зьнікненьне хабару не паўплывала на рашэньне кіраўніцтва КДБ заключыць сп.Конкаля пад варту.

У судзе, які адбыўся ў канцы кастрычніка, прафесар Гарадзенскага медунівэрсытэту Казімір Конкаль адмовіўся прызнаць сябе віноўным. Трэба сказаць, што выявіць у яго амэрыканскія купюры так і не ўдалося. Але “ўлічваючы хадайніцтва калектыву”, прыслужнікі Фэміды вырашылі прымяніць да яго меру пакараньня ў выглядзе арышту тэрмінам на 4 месяцы і 4 дні без канфіскацыі маёмасьці й пазбаўленьня права займацца сваёй мінулай дзейнасьцю. Сп.Конкаль быў вызвалены з-пад варты ў залі суда.