Зноў могуць адкрыць крымінальную справу за графіці :: Хартыя'97 :: Навiны

У судзе Чыгуначнага раёну Гомлі 13 сьнежня працягвалася слуханьне адміністратыўнай справы аб парушэньні актывістам руху ЗУБР і старшынёй гарадзкога маладзёвага цэнтру “Гарт” Сяргеем Адзінцом дэкрэту прэзыдэнта №8 “Аб некаторых мерах па ўдасканаленьні парадку атрыманьня й выкарыстаньня замежнай бязвыплатнай дапамогі”. Як ужо паведамлялася, аргтэхніка коштам прыкладна ў 4 тысячы даляраў ЗША была канфіскавана ў арганізацыі ўпраўленьнем КДБ па Гомельскай вобласьці 10 жніўня ў парадку крымінальнае справы аб графіці.

З цягам часу крымінальную справу спынілі, але тэхніку “Гарту” так і не вярнулі. Падаткавая інспэкцыя па Чыгуначным раёне, сыходзячы з дадзеных КДБ, сцьвярджае, што тэхніка выкарыстоўвалася не па прызначэньні, а для правядзеньня незалежнага назіраньня за ходам прэзыдэнцкіх выбараў, чым і быў парушаны згаданы дэкрэт. У такім выпадку аргтэхніка будзе падлягаць канфіскацыі.

Юрыст Леанід Судаленка, які прадстаўляў у судзе інтарэсы Сяргея Адзінца, заявіў хадайніцтва аб вяртаньні пратаколу аб адміністратыўным правапарушэньні ягонаму складальніку – іспэкцыі падаткавага камітэту па Чыгуначным раёне Гомлі, бо ягоны дакумэнт не ўтрымлівае даты зьдзяйсьненьня правапарушэньня. Як вынікае з матэрыялаў справы, упраўленьне КДБ праінфармавала падаткавую іспэкцыю пра нібыта нестатутную дзейнасьць “Гарту” яшчэ 17 жніўня. Падаткавая інспэкцыя склала свой акт 21 лістапада, калі ўжо сышоў двухмесячны тэрмін на права вынясеньня спагнаньня, прадугледжаны Кодэксам аб адміністратыўных правапарушэньнях.

Аднак суддзя Ганна Новік хадайніцтва аб устанаўленьні правапарушэньня адхіліла. На насутупнае судовае паседжаньне, якое прызначана на 20 сьнежня, суддзя пастанавіла запытаць матэрыялы спыненай адносна “Гарту” крымінальнай справы.