Рэдактар "Пагоні" мае намер размаўляць з АБСЭ без пасярэднікаў ад улады :: Хартыя'97 :: Навiны

У распараджэньні Мікалая Маркевіча, рэдактара закрытай уладамі гарадзенскай недзяржаўнай газэты "Пагоня", апынуўся ліст за подпісам намесьніка міністра замежных справаў Беларусі Васіля Пугачова. Гэты ліст быў накіраваны Пугачовым у Вышэйшы Гаспадарчы суд (ВГС) краіны, які раней прыняў рашэнне аб ліквідацыі "Пагоні". У ім паведамляецца пра тое, што ў адрас МЗС паступіў ліст прадстаўніка па свабодзе СМІ АБСЭ Фраймута Дувэ з выказваньнем заклапочанасьці з нагоды закрыцьця гарадзенскай газэты.

"Нагадваецца, што рашэньне аб закрыцьці дадзенай газэты разглядаецца як спроба абмежаваньня свабоды незалежнай прэсы ў Беларусі", - гаворыцца ў лісьце намесьніка міністра замежных справаў Беларусі. "У сувязі з неабходнасцю падрыхтоўкі ліста ў адказ Фраймуту Дуве", Васіль Пугачоў просіць ВГС накіраваць у МЗС да 21 сьнежня 2001 году "разгорнутую інфармацыю па сутнасьці прычынаў, якія сталі асновай для рашэньня Вышэйшага Гаспадарчага суда аб закрыцьці гарадзенскай газэты "Пагоня".

У сваім камэнтары такой сытуацыі, Мікалай Маркевіч выказаў БелаПАН сумнеў у аб`ектыўнасьці адказу ВГС. Паводле ягоных словаў, суд прыняў рашэньне аб закрыцці газеты і тым самым "выканаў злую палітычную волю", паколькі ніякіх прававых падставаў для закрыцьця газэты не было. Гэта, дарэчы, прызнала нават Міністэрства інфармацыі Беларусі, якое на судзе адмовілася ад зыску, заяўленага ў яго інтарэсах пракуратурай Гарадзенскай вобласьці, сказаў Маркевіч. "Мы зробім усё магчымае, каб спадар Дувэ азнаёміўся і з нашым пунктам гледжаньня", - заявіў галоўны рэдактар закрытага выданьня. Пры гэтым ён выказаў апасеньне, што ўлады Беларусі "ў чарговы раз зьвернуцца да падману сусьветнай супольнаьсці".